गत पुस २६ गते बाँकेको कोहलपुरमा एक युवाको शव विभत्स रूपमा हत्या गरिएको अवस्थामा भेटियो। नेपाल प्रहरीमा भर्ना हुन सुर्खेतबाट कोहलपुर पुगेका दीपकसिंह ठकुरीको घाँटी रेटिएको अवस्थामा शव फेला परको थियो।
शव भेटेपछि प्रहरीले तालिम प्राप्त कुकुर समेत परिचालन गरी अनुसन्धान अघि बढायो ।
घटना भएको ६ दिनपछि प्रहरीले घटनामा सम्लग्न २ जनालाई पक्राउ गरेको छ। युवराज गिरी र अर्का एक जनालाई पक्राउ गरिएको प्रहरीले जनाएको छ।
२ जनामध्ये गिरीलाई खुट्टामा गोली हानेर नियन्त्रणमा लिइएको प्रहरीले जनाएको छ। प्रहरीमा भर्ना हुन आएका ठकुरीलाई यी दुई जनाले जागिर लगाइदिने भन्दै डेढ लाख लिएका थिए।
भर्ना गर्न सक्ने अवस्था नभएको र पैसा पचाउन ठकुरीलाई उनीहरूले हत्या गरेको डिआइजी पिताम्बर अधिकारीले जानकारी दिए।
उनीहरूले साँझ ठकुरीलाई बोलाएर योजना बनाएर नै हत्या गरेको प्रारम्भिक अनुसन्धानबाट खुल्न आएको छ। २ जना पक्राउ परेपछि प्रहरीले थप अनुसन्धान अघि बढाएको छ।
.jpg)
