दाङमा मोटरसाइकल दुर्घटनामा परी एक जनाको मृत्यु भएको छ भने अर्का घाइते भएका छन्।
लमही नगरपालिका वडा नं. ६ देउपुरमा रा २ प १५४३ नम्बरको मोटरसाइकल दुर्घटना हुँदा लमही ५ का २७ वर्षीय नारायण खनालको मृत्यु भएको हो।
उक्त दुर्घटनामा परी मोटरसाइकलको पछाडि सवार लमही ३ फल्कापुर निवासी २७ वर्षकै नारायण पौडेल घाइते भएका छन्।
पौडेलको लमही अस्पतालमा उपचार भैरहेको छ। गम्भीर घाइते खनालको भने उपचारको क्रममा लमही अस्पतालमा मंगलबार साँझ सवा ८ बजेतिर मृत्यु भएको वडा प्रहरी कार्यालय लमहीका प्रहरी प्रमुख अरुणकुमार सिंहले जानकारी दिए।
तीव्र गतिका कारण अनियन्त्रित भई मोटरसाइकल दुर्घटनामा परेको प्रहरीले जानकारी दिएको छ।
मंगलबार नै लमही ५ रातोडाँडामा जिपको ठक्करबाट ७ वर्षीय हेमन्त मल्लको मृत्यु भएको थियो।
बाजुराको फैती गाउँपालिका वडा नं. ३ घर भई हाल लमहीमा बस्दै आएका मल्लको लु १ च ८०४१ नम्बरको जिपको ठक्करबाट मृत्यु भएको थियो।