आफ्नै घर भित्र मृत भेटिएकी २५ वर्षीया शुष्मा कुँवरको हत्यामा संलग्न रहेका मृतकका श्रीमान ३५ वर्षिय मोहन बोहोरालाई सार्वजनिक गर्न माग गर्दै सयौंको संख्यामा महिलाहरुले जिल्ला प्रहरी कार्यालय बर्दियाको परिसर भित्रै प्रवेश गरेर नारा जुलुस गरेका छन्।
बिहिबार दिउँसो १ बजे तिर हजार भन्दा बढिको संख्यामा रहेका महिलाको एक समूह गुलरिया नगर परिक्रमा गर्दै जिल्ला प्रहरी कार्यालय बर्दियाको कार्यालय प्रागणमा प्रवेश गरेका थिए।
एक्कासी हजारभन्दा बढीको संख्यामा आएका महिलाको समूह प्रहरी परिसरको भित्र प्रवेश गरेर आरोपित बोहरालाई सार्वजनिक गर्न माग गरेका थिए ।
बोहरालाई सार्वजनिक नगरेसम्म प्रहरी कार्यालय परिसर बाहिर नजाने भनेपछि प्रहरीले पक्राउ गरेका बोहरालाई जिल्ला प्रहरी कार्यालय बर्दियाको भवन माथिबाट सार्वजनिक गरेको थियो।
मृतकका माइती पक्षका र महिलाको समूहले पक्राउ परेका मोहन बोहरालाई सार्वजनिक नगरेसम्म परिसर बाहिर नजाने भनेपछि बोहरालाई सार्वजनिक गरेको जिल्ला प्रहरी कार्यालय बर्दियाका प्रहरी उपरीक्षक सुरेन्द्र मैनालीले बताए।
पक्राउ परेकालाई कडाभन्दा कडा सजाय हुनुपर्ने र मृतकका दुई छोराको पालन–पोषण सरकारले गर्नुपर्ने र्यालीमा सहभागि महिला अधिकारकर्मी बिष्णु नेपालीले बताइन्।
गुलरिया नगरपालिका वडा नं ५ निवासी २५ वर्षिया शुष्मा कुँवर बोहराको सोमबार बेलुकी हत्या गरी भाग्दै गरेको अवस्थामा बर्दियाको गुलरिया नगरपालिका वडा नं २ को खैरापुरबाट बोहरालाई प्रहरीले पक्राउ गरेको थियो ।
मृतक शुष्मा कुँवरको हत्यामा पक्राउ परेका बोहरालाई सर्वस्वसहित आजीवन कारावास हुनुपर्ने र्यालीमा सहभागी बढैया गाँउपालिकाकी महिला अभियन्ता कौसिला सिंहले बताइन्।
हत्याको आरोप लागेका बोहराका आमाबुवालाई समेत स्थानीयको उजुरीका आधारमा प्रहरिले पक्राउ गरेको थियो। मृतक शुष्मा बोहराका ससुरा टिकाराम बोहरा र सासु बिज्जु बोहरालाई समेत पक्राउ गरि अनुसन्धान भईरहेको प्रहरी उपरीक्षक सुरेन्द्र मैनालीले बताए।