काठमाडौं र ललितपुर महानगरपालिकाले चक्रपथ मोनोरेलको विस्तृत परियोजना प्रतिवेदन (डिपिआर) बनाउने जिम्मा पनि चिनियाँ कम्पनीलाई नै दिने निर्णय गरेको छ।
चाइनाको चाइना रेलवे २५ औं व्यूरो ग्रुप कम्पनी लिमिटेड (सिआरसीसी) लाई डिपिआर बनाउन दिन बुधबार सहमतिपत्रमा हस्ताक्षर गर्ने भएको हो।
यसअघि गत भदौ २८ गते चिनियाँ कम्पनी सिआरसिसीले मोनोरेलको सम्भाव्यता अध्ययन गरेको थियो। ६ महिनाको समय दिइए पनि तीन महिनामै उसले सम्भाव्यता अध्ययन प्रतिवेदन काठमाडौं र ललितपुर महानगरपालिकालाई बुझाएको हो।
सिआरसिसीले प्रतिवेदनमा आफू नै डिपिआरका लागि इच्छुक भएको बताएको थियो।
मोनोरेलको सम्भाव्यता अध्ययन गरेको चिनियाँ कम्पनी सिआरसिसीको प्रतिवदेनअनुसार काठमाडौं र ललितपुरमा पर्ने २७ किलोमिटर लामो चक्रपथमा चल्ने मोनोरेल ३ वर्षमा बनाउन सकिने छ।
काठमाडौंमा मोनोरेल बनाउन १ खर्ब १६ अर्ब रूपैयाँ लाग्ने कम्पनीले तयार गरेको प्रतिवेदनमा उल्लेख छ।
