गर्भवती महिलाको हत्या गरी फरार रहेका चार जना अभियुक्तलाई प्रहरीले पक्राउ गरेको छ।
महानगरीय अपराध महाशाखाको टोलीले आइतबार मुगुकी विष्णुमाया मल्ल, भगवती मल्ल, रिता केसी र गान्डिपराज मल्ललाई काठमाडौंका विभिन्न ठाउँबाट पक्राउ गरेको हो।
महाशाखा प्रमुख एसएसपी धीरजप्रताप सिंहका अनुसार उनीहरूले टोखा नगरपालिका ३ मिलनटोलस्थित तारानाथ अर्यालको घरमा डेरा गरी बस्ने मुगु सोरु गाउँपालिका ८ की २६ वर्षीया अजिता मल्लको घाँटी थिची हत्या गरेका थिए।
पुस १ गते मल्लको हत्या भएको थियो। हत्यालगत्तै परिचालन भएको महाशाखाको टोलीले संलग्नहरूलाई पक्राउ गरेको हो। महाशाखा प्रमुख सिंहका अनुसार पक्राउ परेकाले अपराध स्वीकार गरिसकेका छन्। उनीहरूलाई कर्तव्य ज्यान मुद्दामा अदालतमा पेश गर्ने तयारी भइरहेको सिंहले बताए।
हत्याको कारणबारे अनुसन्धान भइरहेको एसएसपी सिंहले बताए।
केही दिनअघि महाशाखाको टोलीले गोंगबुका प्रयास कुँवरको हत्यामा संलग्न स्यांजाका महेन्द्र सार्कीलाई २४ घन्टाभित्र पक्राउ गरेको थियो। महाशाखा प्रमुख सिंहले अपराध गर्ने जोकोहीलाई छिटोभन्दा छिटो कानुनी दायरामा ल्याउन महाशाखा सक्षम भएको बताए।
