प्रहरीले ६ महिनाकी गर्भवतीको हत्या गरी फरार अभियुक्तलाई पक्राउ गरेको छ।
गएराति टोखा नगरपालिका -८ मिलनटोलमा रहेको तारानाथ अर्यालको घरमा डेरा गरी बस्ने मुगु सोरु गाउँपालिका-८ निवासी २६ वर्षीया अजिता मल्ललाई मुख थुनी घाँटी थिची हत्या गरेको अभियोगमा ४ जनालाई प्रहरीले सोमबार पक्राउ गरेको हो।
श्रीमान धर्मराज शाहीले सौता ल्याएपछि खान लगाउन नदिएको र रिसले सौताको हत्या गरेको विष्णुमाया मल्ले (शाही) बयानमा भनेकी छन्।
पक्राउ पर्नेमा विष्णुमाया मल्ल (शाही), भगवती मल्ल, रिता केसी र गान्दिपराज मल्ल रहेका छन्।
उनीहरूलाई विशेष सूचनाको आधारमा अपराध महाशाखाको प्रहरी टोलीले सोमबार काठमाडौंका विभिन्न स्थानबाट पक्राउ गरी सोधपुछ गर्दा उनीहरूले आफूले गरेको अपराध स्वीकार गरेको प्रहरीले बताएको छ।
अन्य विषयमा अनुसन्धान जारी रहेको प्रहरीले जनाएको छ।
