पशुपति क्षेत्रमा कंक्रिटको पदमार्ग बनाउन नहुने भन्दै ध्यानाकर्षण गराउन पशुपति क्षेत्र विकास कोषको कार्यालय पुगेका सम्पदा संरक्षण अभियन्ताहरू पक्राउ परेका छन्। कोषले कानुनविपरित सम्पदा क्षेत्रमा कंक्रिट प्रयोग गरेको र यसलाई यथाशिघ्र सच्याउन उनीहरूले माग राखेका थिए।
गौशाला प्रहरीले गणपतिलाल श्रेष्ठ, सञ्जय अधिकारी, ललिमा श्रेष्ठ, आशा थापा, पूर्ण बिक्रम राणा, अर्जुन राणा लगायतका अभियन्तालाई पक्राउ गरेको हो।
तीन महिनाअघि श्लेष्मान्तक क्षेत्रमा कंक्रिट पदमार्ग निर्माण थालिएको थियो। व्यापक विरोधपछि रोकिएको काम फेरि सुरू भएको छ।
पशुपति क्षेत्र जगेर्ना गर्न ध्यान दिनुपर्नेमा 'रक्षक नै भक्षक' भई यहाँको वन विनाश गरिएको भन्दै उनीहरूले आइतबार कोषको कार्यालय घेराउ गरेका हुन्।
कोषले मृगस्थली क्षेत्र घुम्न सजिलो होस् भनेर पदमार्ग निर्माण गर्न लागेको छ। साँस्कृतिक सम्पदामा कंक्रिट प्रयोग नगर्न भनिए पनि फेरि निरन्तरता दिइएको उनीहरूको आरोप छ। दुई करोड ९९ लाख रुपैयाँमा निर्माण ठेक्का धर्म एस निर्माण सेवालाई दिइएको छ।
पशुपति संरक्षित स्मारक क्षेत्रमा कंक्रिट प्रयोग गर्दा प्राचीन स्मारक संरक्षण ऐन विपरीत भएको अभियन्ता सञ्जय अधिकारी बताउँछन्।
‘ऐन र मापदण्डले आधुनिक निर्माण सामग्री प्रयोग परिकल्पना नै गरेको छैन,’ उनी भन्छन्, ‘नयाँ संरचना बनाउँदा जंगल मासिने खतरा हुन्छ । यो जंगल आफैंमा सम्पदा हो । यसमा जथाभावी गर्नु भनेको सम्पदा मास्नु हो।’
मृगस्थलीमा कंक्रिट राख्नु अदालतको आदेशविपरीत भएको अधिकारी बताउँछन्। सर्वोच्च अदालतले २०७३ पुसमा नै यहाँ कंक्रिट संरचना नबनाउन आदेश दिएको थियो। त्यहाँ शव गाड्न कंक्रिटको संरचना बनाइँदै आएको थियो। त्यसले वातावरणमा असर पर्ने अदालतले उल्लेख गरेको थियो।
अदालतको यो नजिरअनुसार श्लेष्मान्तकमा कंक्रिट राख्न नमिल्ने र जथाभावी खन्नसमेत नमिल्ने अधिकारी बताउँछन्।
‘शव गाड्दामात्रै कंक्रिट नराख भनेको होइन,’ अधिकारी भन्छन्, ‘यो जंगल क्षेत्रमा कतै पनि कंक्रिट नराख भनेको हो अदालतको आदेशले। यो आदेश कोषले पालना गर्नु पर्दैन? यो अदालतको मानहानी हो।’
श्लेष्मान्तक वनको यही पदमार्गमा समेत गत असोजमा पुरातत्त्व विभागले काम रोक्न निर्देशन दिएको थियो ।