औरहीमा आपराधिक घटना लगातारः
औरही नगरपालिका २ फुलबरियाका ४० वर्षिया किसान बेचु महतोको हत्या अनैतिक सम्बन्धको पोल खुल्ने डरले भएको रहस्य खुलेको छ ।
महोत्तरी प्रहरीले किसान महतोको हत्यामा संलग्न रहेको आरोपमा एक महिलासहित तीन जनालाई पक्राउ गरेको छ। पक्राउपछि हत्याको कारण अनैतिक सम्बन्धको पोल खुल्ने डर रहेको रहस्य खुलेको जिल्ला प्रहरी कार्यालय महोत्तरीका एसपी ईश्वर कार्कीले प्रष्ट पारेका छन्।
इलाका प्रहरी कार्यालय गौशालाका प्रमुख ईन्सपेक्टर किशोर आर्चायको नेतृत्वमा घटना सम्बन्धि गहिरो अनुसन्धान पछि उक्त घटनामा संलग्न रहेको आरोपमा औरही नगरपालिका २ फुलवरियाका २२ वर्षिय जितनी देवी महतो , सोही ठाउँका २४ वर्षिय शुशील सहनी र सोही नगरपालिकाको चेपकट गाउँ बस्ने अनिल कुमार ठाकुरलाई पक्राउ गरेर शनिबार पत्रकार सम्मेलन गरि सार्वजनिक गरेको छ।
जिल्ला प्रहरी कार्यालय महोत्तरीमा आरोपीहरूलाई सार्वजनिक गर्दै प्रहरी प्रमुख एसपी कार्कीले हत्याको मुख्य कारण अनैतिक सम्बन्ध नै रहेको दाबी गरेका हुन्।
‘किसान महतोको हत्याको मुल कारण अनैतिक सम्बन्ध रहेको हाम्रो अनुसन्धानबाट देखिएको छ,’ एसपी कार्कीले भने, ‘पक्राउ परेको आरोपीहरूले प्रहरीलाई दिएको वयानमा किसान महतोको हत्याको कारण अनैतिक सम्बन्धको पोल खुल्ने डर नै रहेको स्वीकारेका छन्, घटना सम्बन्धी थप अनुसन्धान भइरहेकोले बाँकी कुरा अनुसन्धानबाट पछि खुल्दै जानेछ।’
२०७५ मंसिर २४ गतेका दिन राति ८ बजेको समयमा औरही २ फुलवरिया घर भएका बिजय महतोको पत्नी जितनी देवी महतो र सोहि ठाउँ बस्ने शुशिल सहनीसँगै बसेको अवस्थामा मृतक किसान बेचु महतोले देखेको थिए।
त्यति बेला बेचुले दुवैलाई गाली गलौज गर्नुका साथै जितनीको मोवाईलसमेत खोसेर लगेको थिए।
त्यसको भोलिपल्ट मंसिर २५ गते दिउँसो मृतक महतोले जितनीलाई यौन सम्पर्कको प्रस्ताव राखेको र सो कुरा जितनीले शुशील सहनीलाई बताएकी थिइन्।
शुशिल सहनीलाई जितनीले बेचुको प्रस्तावबारे बताएपछि त्यति बेलैदेखि शुसिलले रिसमा आएर आफ्नो अनैतिक सम्बन्धको पोल खुल्ने डरले बेचु महतो मार्ने योजना बुन्न शुरु गरेको आरोपीहरुले प्रहरीसँग बयान दिएको एसपी कार्कीले बताए।
मंसिर २६ गते राति १० बजेसम्म बेचु आफ्नो पत्नीसँगै घरमै सुतिरहेका थिए। त्यसपछि आरोपीहरूले राति १० बजे तिर बेचुलाई घटनास्थलमा बोलाएर सहनीको ज्याकेटको टोपीमा लागेको तुना (डोरी) सहित घाटीमा बेरेर उनको हत्या गरेर औरही २ स्थित रामराज ठाकुरको उखुखेतमा शव फालेर भागेका थिए।
यता आफूसँगै सुतिरहेको पति ओछयानमा नदेखेपछि मृतककी पत्नीले छोराहरूलाई सुनाएकी थिइन्।
सुरूमा काउली खेत तर्फ गएको होला भन्दै खोजी गरिए पनि बिहान ४ बजे उखु खेतमा शव फेला परेको थियो। आरोपीले बेचुलाई बोलाएर हत्या गरेपछि शव लुकाउने मनसायले उखु खेत भित्र घिसारेर फालेका थिए।
यता घटनामा सुशीललाई मामा भन्ने अनिल ठाकुरले पनि साथ दिएको प्रहरी अनुसन्धानबाट खुलेको छ।
अनिल र सुशील दुवैसँग मादक पदार्थ सेवन गरेर घटनालाई अञ्जाम दिएको एसपी कार्कीले बताए।
घटनामा संलग्न जितनीदेवीलाई उनको घरबाटै पक्राउ गरिएको छ भने सुशिललाई सीमावर्ती बजार मटिहानी नजिकको गाउँबाट र अनिललाई सिन्धुलीबाट पक्राउ गरिएको एसपी कार्कीले जानकारी दिए।
तीनै जनालाई अहिले जिल्ला प्रहरी कार्यालय महोत्तरीमा राखि आवश्यक अनुसन्धान भईरहेको र तीनै जनामाथि कर्तब्य ज्यान सम्बन्धी मुद्दा चलाइने एसपी कार्कीले जानकारी दिए।
यसअघि पनि महोत्तरीम भदौ १० गते औरहीकी आठ महिने बालिका सोनाली चौधरीको अपहण गरेर हत्या भएको थियो। औरही नगरपालिकामा शृंखलाबद्ध आपराधिक घटना भइरहेका छन्।
यी दुई घटनाले महोत्तरीलाई अस्तव्यस्त बनाएको छ। महोत्तरीमा एकपछि अर्को गम्भीर प्रकृतिका घटना बढ्दै गइरहेकाले स्थानीय त्रसित भएका छन्।
जिल्लामा सुरक्षा अवस्था फितलो भएपछि औरहीका स्थानीयहरुले शनिबार बिहान शान्ति सुरक्षाको माग गर्दै जलेश्वर बर्दिबास सडकखण्ड चार घण्टा अवरूद्व पारी आन्दोलनमा उत्रिएका थिए।