प्रदेश पाँचका सबै विद्यालयमा एउटै किसिमको पोशाक बनाईने भएको छ।
प्रदेश नं. ५ सरकारले सबै विद्यालयमा एकै किसिमको पाठ्यक्रम र पोशाक लागू गर्ने तयारी गरेको छ। विद्यालयको पाठ्यक्रम मात्र नभई पाठ्यपुस्तकसमेत एउटै बनाउने योजना मन्त्रालयको छ।
प्रदेश नं. ५ सामाजिक विकास मन्त्रालयले एकै किसिमको पाठ्यक्रम, पाठ्यपुस्तक र पोशाक लागू भएसँगै अभिभावकको निजीतर्फको बढ्दो आकर्षण र सामुदायिक विद्यालयप्रतिको विकर्षण घट्ने अपेक्षा गरेको छ।
निजी र सामुदायिक विद्यालयबीचको अन्तर घटाउन, एकरूपता ल्याउन एवम् एकै खालको शिक्षा प्रदान गर्न भन्दै विद्यालयमा एउटै पाठ्यक्रम र पोसाकको तयारी मन्त्रालयले गरेको हो। अहिले मावी तहको शिक्षाको व्यवस्थापन, गुणस्तर मापन र पाठ्यक्रम तथा पाठ्यपुस्तक निर्माण र लागू गर्ने जिम्मा प्रदेश सरकारले पाएको छ।
यो अधिकार उपयोग गर्दै सामाजिक विकास मन्त्रालयको शिक्षा निर्देशनालयले प्रारम्भिक काम थालेको छ। स्थानीय तह, विद्यालयका प्रधानाध्यापक र अभिभावकसितको छलफलपछि निर्देशनालयले पाठ्यक्रम बनाउन विज्ञ समूह बनाउनेछ।
उक्त समूहको सुझावमा पाठ्यक्रम तथा पाठ्यपुस्तक तयार गरेर लागू गर्ने योजना रहेको मन्त्रालयको छ।
विकास मन्त्रालय शैक्षिक योजना तथा अनुसन्धान महाशाखाका उपसचिव थानेश्वर ज्ञवालीले जानकारी दिए।
विद्यालय पिच्छे फरक–फरक पोसाक हुँदा कतिपय विद्यालयले तिनै पोसाकबाट पनि चर्को कमिसन खाएको गुनासो आएकाले आगामी शैक्षिक सत्रदेखि एउटै पोसाक बनाउने तयारी मन्त्रालयले गरेको हो।
प्रदेश सरकारले अघि सारेको विद्यालयमा एउटै पाठ्यक्रम र पोसाकको योजनालाई आगामी वर्षदेखि नै कार्यान्वयनमा ल्याउन अभिभावक सम्बद्ध संघ संस्थाले आग्रह गरेका छन्।
प्रदेश सरकारले बनाएको यो योजना कार्यान्वयन भए एउटै पाठ्यक्रम र पोसाकले विद्यार्थीलाई प्रतिस्पर्धी बनाउन मात्र होइन एकै खालका विद्यार्थी उत्पादन गर्न सहयोग पुग्ने अपेक्षा गरिएको छ।
त्यस्तै कमिसनको लोभमा निजी विद्यालयले वर्षेनी पाठ्यपुस्तक फेर्ने र अभिभावकलाई मर्कामा पार्ने समस्या रोकिने विश्वास गरिएको छ।