महानगरीय प्रहरी वृत्त थानकोटले प्रतिबन्धित लागुऔषधसहित ४ जनालाई पक्राउ गरेको छ।
चन्द्रागिरी २ वाडभञ्ज्याङबाट मसिने जाने कच्चीसडक खण्डको देउराली जंगलको बाटो हुँदै लागुऔषध ल्याउँदै गरेको गोप्य सूचनाको आधारमा प्रहरी टोलीले १० किलो ४०० ग्राम अवैध चरेससहित एक जनालाई पक्राउ गरेको हो ।
कालो रंगको झोलामा खैरो रंगको काटुन टेपले बेरी लुकाई छिपाई ल्याउँदै गरेको अवस्थामा लागूऔषध चरेससहित जिल्ला धादिङ गजुरी गाउँ पालिका वडा नम्बर ८ बस्ने ३१ वर्षीय कमल तामाङलाई पक्राउ गरिएको महानगरीय प्रहरी वृत्तका प्रहरी नायब उपरीक्षक कुमार विक्रम थापाले बताए।
यसैगरी, धनगढी तर्फबाट काठमाडौं आउँदै गरेको ना ५ ख ९४०६ नम्बरको यात्रुबाहक बसलाई नागढुंगास्थित चेकपोइन्टमा चेकजाँच गर्ने क्रममा उक्त बसमा सवार कैलाली गोदावरी नगरपालिका वडा नम्बर २ घर भएका १८ वर्षीय राजन खनालले झोलामा लुकाई छिपाई लिई आएको नाइट्राभेट ३०० ट्यावलेटसहित नियन्त्रणमा लिएको प्रहरीले जनाएको छ।
सोही घटनामा जिल्ला भक्तपुर सूर्यविनायक नगरपालिका सिरुटार बस्ने २१ वर्षीय अजय तामाङलाई समेत नियन्त्रणमा लिइएको प्रहरीले बताएको छ।
त्यस्तै, नागढुङ्गाको चेकपोइन्टमा चेकजाँच गर्ने क्रममा झापा तर्फबाट काठमाडौं आउँदै गरेको ना ५ ख ४९७२ नम्बरको यात्रुबाहक बसलाई चेकजाँच गर्दा उक्त बसमा सवार २१ वर्षीय साजन भुजेलले बोकेको हरियो रंगको हाते प्लास्टिकको झोला समेत चेकजाँच गर्दा मोबाइलको बट्टाभित्र प्याक गरिएको अवस्थामा लागुऔषध डाइजेपाम ३० एम्पुल, फेनारगन ३० एम्पुल, नुपिन ३० एम्पुल र सिरिन्ज १७ थान बरामद गरिएको डिएसपी थापाले बताए।
