दाङमा टिप्परले मोटरसाईकललाई ठक्कर दिँदा एक जनाको मृत्यु भएको छ भने अर्का एक गम्भीर घाईते भएका छन्।
घोराहीबाट–तुलसीपुर तर्फ आउँदै गरेको रा १ क ५८२ नम्बरको टिप्परले एकै दिशातर्फ आउँदै गरेको रा ३ प ८०८२ नम्बरको मोटरसाईकललाई ठक्कर दिँदा मोटरसाईकलमा सवार घोराही उपमहानगरपालिका वडा नं. १६ निवासी ४० बर्षीय तेजबहादुर खत्रीको घटनास्थलमै मृत्यु भएको जिल्ला प्रहरी प्रवक्ता रामप्रशाद घर्तीले जानकारी दिए।
मोटरसाईकल चालक ३५ वर्षीय तेजबहादुर गिरीको अवस्था गम्भीर रहेको प्रहरीले जानकारी दिएको छ। गम्भीर घाइते मोटरसाईकल चालक गिरीको घोराहीस्थित राप्ती स्वास्थ्य विज्ञान प्रतिष्ठानमा उपचार भइरहेको छ।
मंगलबार मध्यान्हः १२ बजेतिर घोराहीबाट तुलसीपुरतर्फ आउँदै गरेको टिप्परले एकैदिशा तर्फ आउँदै गरेको मोटरसाईकललाई घोराही १६ राउतगाउँ चोकमा ठक्कर दिएको प्रहरीले जानकारी दिएको छ।
मोटरसाईकलले ओभरटेक गर्न खोज्दा उक्त दुर्घटना भएको तर टिप्पर चालकले प्रहरी समक्ष दाबी गरेका छन्। ठक्कर दिने टिप्पर चालकलाई प्रहरीले नियन्त्रणमा लिएको छ।
