महोत्तरीको औरही नगरपालिका १ का सन्तोष चौधरीकी दुधे बालिकाको अपहरणपछि हत्याको आरोपीलाई प्रहरीले शनिबार पक्राउ गरेको छ।
पक्राउ पर्नेमा भंगाहा नगरपालिका १ हर्तिसर्वा जमुनियाका २५ वर्षीय भरत साह रहेको जिल्ला प्रहरी कार्यालय महोत्तरीका एसपी ईश्वर कार्कीले सेतोपाटीलाई जानकारी दिए।
उनलाई सुनसरी प्रहरीले ईनरूवास्थित भण्टावारीमा अटोरिक्सा चोरिरहेको अवस्थामा पक्राउ गरेको कार्कीले जानकारी दिए।
भण्टावारीस्थित प्रहरी चौकीमा कार्यरत प्रहरी सहायक निरीक्षक अवधलाल साहको टोलीले हत्याको आरोपी भरतलाई पक्राउ गरेको हो।
औरही नगरपालिकाको वडा नं १ स्थित औरही बजारमा किराना पसल चलाउँदै आएका चौधरीकी आठ महिने छोरी सोनालिकाको भदौ ९ गते आइतबार अपहरणपछि हत्या भएको थियो। सोमबार दिउँसो उनको शव फेला परेको थियो।
प्रहरीका अनुसार शिशुलाई मागेर लगेको फुटेज व्यवसायी चौधरीको पसलमा जडान गरेको सिसिटिभी क्यामेरामा कैद भएको थियो। त्यही फुटेजबाट हत्यारा भरत रहेको पहिचान भएको थियो। तर घटनापश्चात् भरत फरार रहेका थिए।
