ईलाका प्रहरी कार्यालय बुटवलले बुटवल उपमहानगरपालिका १३ बेलबासबाट जुवा खेल्दै गरेका ९ जनालाई पक्राउ गरेको छ।
स्थानीय यम बहादुर कार्कीको घरमा जुवा खेल्दै गरेका उनीहरूलाई मंगलबार साँझ जुवाको खालबाटै पक्राउ गरेको ईलाका प्रहरी कार्यालय बुटवलका प्रमुख प्रहरी नायब उपरीक्षक डिल बहादुर मल्लले जानकारी दिए।
केही स्थानहरूमा दसैँ तथा तिहारमा अत्यधिक जुवा खेल्ने सुईको पाएका मल्लले केही दिनअघि पत्रकारहरूमाझ दसैँमा ६ डिजिटमा खेलिने जुवाका अखडा भत्काउने बताएका थिए। सोही अनुरुप फूलपातीको दिनमै जुवा खेलिरहेका ९ जनासहित १ लाख ९२ हजार ३ सय २५ रुपैयाँ बरामद गरेको मल्लले जानकारी दिए ।
पक्राउ परेकाहरूमा एलबी गुरुङ, बोधराज कार्की, मिन बहादुर गाहा, डिल बहादुर थापा, महेन्द्र थापा, बाबुराम आचार्य, रामप्रसाद भट्टराई, शेर बहादुर गुरुङ र छम बहादुर थापा रहेका छन् ।
पक्राउ परेका सबैलाई जुवा ऐन अन्तर्गत मुद्दा चलाइने प्रहरी नायब उपरीक्षक मल्लले जानकारी दिए।
चोरी, डकैती तथा अन्य अपराधहरूको सुरूवात जुवा तथा मदिराबाट सुरू हुने भएकोले चाडपर्वको नाममा खेलिने जुवा र मदिरा सेवनलाई नियन्त्रण गर्न प्रहरी सक्रियता बढाइएको उनले बताए।
