स्थानीय सरकारले हिलिहाङ –२ का विर्खबहादुर योङहाङलाई घर बनाई दिएको छ।
स्थानिय सरकार पाएपछि उनी दङ्ग परेका छन् । आर्थिकरूपले अति विपन्न परिवारका विर्खबहादुरलाई हिलिहाङ गाउँपालिकाले घर बनाइदिएर हस्तान्तरण गरेको हो ।
जनश्रमदान तथा वडा कार्यालयले छुट्याएको बजेटसहित कूल एक लाख २० हजार रूपैयाँको लागतमा विर्खबहादुरका लागि घर तयार भएको हो ।
टिन र काठले बनाइएको घर संविधान दिवसका अवसर पारेर विर्खबहादुरलाई जिम्मा लगाइएको गाउँपालिकाका प्रमुख प्रशासकीय अधिकृत प्रवीण दाहालले बताए ।
आफ्नो घर नहुँदा उनी अरूका घर र ओढारमा बस्ने गर्थे। यसरी जीवन बिताएको झण्डै १० वर्षपछि विर्खबहादुरले सरकारी सहयोगमा आफ्नै घर पाएका हुन् ।
१० वर्ष पहिले विर्खबहादुरको एक तलाको घर भत्किएर छाप्रोमा परिणत भएको थियो । घर भत्किएपछि उनले गुजारा गरिरहेको छाप्रोमा घामपानी छल्ने छानो र गार्हो दुबै थिएन।
छिमेकीको सहयोगमा दुई छाक टार्ने विर्खबहादुर र उनकी पत्नी मायाले बनिबुतो गरेर कमाउँदै आफ्नो गुजारा चलाउँदै आएका थिए ।
७० वर्षका पति र ५० कटेकी पत्नीले गर्नसक्ने अरू केही थिएन पनि । उनीहरूलाई विगतबाटै सहयोग गर्दै आएका स्थानीय व्यवसायी मदन गौतम हिलिहाङ गाँउपालिका–३ का वडाध्यक्षमा चुनिएपछि योङहाङ परिवारको दिन फिरेको हो ।
