नेपाली सेनाले राष्ट्रिय गौरव तथा रणनीतिक महत्वको काठमाडौं-तराई द्रुतमार्ग (फास्ट ट्रयाक) चार वर्षमा तयार हुने बताएको छ।
सैनिक जनसम्पर्क निर्देशनालयले बिहीबार पत्रकार सम्मेलन गरी चार महिनाभित्र विस्तृत परियोजना प्रतिवेदन (डिपिआर) तयार हुने जानकारी दिएको छ।
डिपिआर तयार गर्न कोरियाली सम्पनी सुसुङसंग असोज ६ गते सम्झौता हुने भएको छ।
फास्ट ट्रयाक निर्माणको जिम्मेवारी पाएको १३ महिनापछि सेनाले डिपिआर गर्ने कम्पनी छनौट गरेको हो।
पत्रकार सम्मेलनमा बोल्दै फास्ट ट्रयाक आयोजना प्रमुख उपरथि योगेन्द्रबहादुर खाँणले १० करोड १५ लाख रुपैयाँमा डिपिआर तयार हुने जानकारी दिए।
डिपिआर बनाउन १७ विदेशी कम्पनीले आवेदन दिएका थिए। तीमध्येबाट छानिएको कोरियाली कम्पनीसँग सेनाले सम्झौता गर्न लागेको हो।
‘आगामी ४ वर्षभित्र सडक निमार्ण कार्य सक्ने गरी काम भइरहेको छ,’ उपरथि खाँणले भने।
एशियाली विकास बैंकले सन् २००८ मा तयार गरेको सम्भाव्यता अध्ययन प्रतिवेदनलाई आधार मानेर सेनाले निर्माणसम्बन्धी आधारभूत र प्रारम्भिक कार्य गरिरहेको उनले बताए।
उनका अनुसार फास्ट ट्रयाकको डिजाइनमा सेनाले केही परिवर्तन गर्न लागेको छ।
छोक्रेडाँडादेखि बाँदरे खोल्सीसम्मको करिब १२ किलोमिटर क्षेत्रमा तीन वटा सुरुङ निर्माण गर्ने गरी यसअघिको रेखाङ्कन परिवर्तन गर्नु उपयुक्त हुने सेनाको निष्कर्ष छ।
१ वर्षमा सेनाले निमार्ण कार्यमा सफलता हात पारेको उल्लेख गर्दै उपरथि खाँणले सडक निर्माणमा आवश्यक पर्ने ९० प्रतिशत जग्गा अधिग्रहण भइसकेको र २० हजारमध्ये १९ हजार रूख काटिसकिएको जानकारी दिए।
सडक निमार्णमा खटिने सेना बस्ने ८ ओटा क्याम्प निमार्ण गरिसकेको र २ ओटा निमार्णाधीन अवस्थामा रहेको पनि उनले बताए।
५४ किलोमिटर लामो सडकका विभिन्न ठाउँमा कटिङ र फिलिङको काम पनि भइरहेको उनले बताए।