कोका–कोलाले गाँजा मिसाइएको पेय उत्पादन गर्न सक्ने सम्भावना बढेको छ।
अमेरिकाको यो बहुराष्ट्रिय कम्पनीले गाँजामिश्रित पेय पदार्थको बजार सम्भावना नजिकबाट नियालिरहेको सोमबार जनाएको हो।
केही दिनअघि कोका–कोला र क्यानडाको इजाजतप्राप्त गाँजा उत्पादक अरोरा क्यानाबिज इन्कबीच वार्ता चलिरहेको सञ्चारमाध्यमहरूले लेखेका थिए।
आर्थिक समाचार प्रसारण गर्ने क्यानेडियन च्यानल बिएनएन ब्लुमबर्गले उक्त वार्ताबारे पहिलो सूचना सार्वजनिक गरेको थियो।
यी दुवै कम्पनीले छुट्टाछुट्टै विज्ञप्ति जारी गरी गाँजामिश्रित पेय उत्पादनमा आफ्नो रुचि दर्शाएका छन्। यसका लागि सहकार्य गर्न वार्ता सुरु गरेको समाचारमा भने उनीहरूले कुनै टिप्पणी गरेनन्।
अत्यधिक चिनी मिसिएकाले कोका–कोलालाई स्वास्थ्यवर्द्धक पेय मानिँदैन। यसले अन्तर्राष्ट्रिय बजारमा कोका–कोलाका उत्पादनको माग घट्दो छ। यही चुनौतीबीच कोकले कफीमिश्रित र अन्य स्वास्थ्यवर्द्धक पेय उत्पादनमा ध्यान दिन थालेको छि। गाँजाको मिश्रण त्यही बजार विविधीकरण अभियानकै निरन्तरता हुनसक्छ।
कोक र अरोराबीचको वार्ता सफल हुन्छ भन्ने ग्यारेन्टी नभएको सञ्चारमाध्यमहरूले लेखेका छन्। नतिजा जे भए पनि यसले अरोराको सेयर मूल्य २२ प्रतिशत वृद्धि भएको छ। उता, न्यूयोर्क स्टक एक्सचेन्जमा कोकको सेयर मूल्य पनि बढेको छ।
गाँजाले मानव स्वास्थ्यमा फाइदा गर्ने वैज्ञानिक अनुसन्धानबाट पुष्टि भएपछि संसारका ठूल्ठूला कम्पनी यसमा आकर्षित छन्। अमेरिकी राज्यहरूले धमाधम गाँजालाई कानुनी मान्यता दिने क्रम बढ्दो छ। अमेरिकाकै संघीय कानुनले भने अझै पनि गाँजालाई अवैधानिक मानेकाले अमेरिकी कम्पनीहरू यसको व्यवसायमा हात हाल्न सशंकित छन्।
अरोरा क्यानाबिजकी प्रवक्ताले गाँजासँग सम्बन्धित नयाँ व्यापार सम्भावनाको खोजी भइरहे पनि टुंगो नलागेसम्म सार्वजनिक गर्न नमिल्ने बताएकी छन्।
‘अरोराले यसमा आफ्नो व्यापारिक इच्छा देखाइसकेको छ। हामी यो बजारमा प्रवेश गर्न चाहन्छौं,’ अरोराकी प्रवक्ता हैदर म्याकग्रेगरले भनेकी छन्, ‘गाँजा उत्पादनको क्षेत्रमा धेरै नयाँ प्रयोग भइरहेका छन्। यसमा ठूलो सम्भावना छ भन्ने हामीलाई लाग्छ।’
कोका–कोला र अरोराले गाँजा मिश्रणबाट शरीर सुन्नेको, मांसपेसी बाउँडिएको र दुखाइ कम हुने पेय उत्पादन गर्ने अनुमान गरिएको छ।