महोत्तरी जिल्लाको लोहरपट्टी नगरपालिका ३ स्थित महदैया तपनपुरमा बकर–इद पर्वको अवसरमा ‘इदुल जोहाको नमाज कुन इमामले पढाउने’ भन्नेबारे दुई समूहबीच विवाद हुँदा एक दर्जन घाइते भएका छन्।
दुई पक्षीय झडपमा सोही ठाउँका ४५ वर्षीय रिस्तम राईन, १८ वर्षीय सुनि राईन, ३५ वर्षीय अतावुल राईन, ४५ वर्षीय अहमद राईन, ५० वर्षीय युनिस राईन, अनिश राईन, मञ्जुर कवारी, अख्तर राईन र जलाउदिन राईन घाइते भएका डिएसपी खगेन्द्र बहादुर खड्काले बताए।
घाइतेमध्ये ४ जनाको अवस्था गम्भीर रहेकोले उनीहरूलाई उपचारका लागि जनकपुर अञ्चल अस्पताल लगिएको र अन्य घाइतेको स्थानीय अस्पतालमा उपचार भइरहेको प्रहरीले जनाएको छ।
प्रहरीले स्थिति नियन्त्रणमा लिन २ राउण्ड हवाइ फायर समेत गर्नुपरेको जिल्ला प्रहरी कार्यालय महोत्तरीका डिएसपी खगेन्द्र बहादुर खड्काले बताए।
उनको अनुसार अहिले त्यहाँको स्थिति निकै तनावपूर्ण छ। प्रहरीले भीडलाई तितरवितर गरे पनि स्थिति तनावपूर्ण छ। उनले भने, ‘अहिले प्रहरी र सशस्त्र प्रहरीको टोलीले मस्जिदलाई घेराबन्दी गरी कसैलाई पनि प्रवेश गर्न दिएको छैन।’
प्रमुख जिल्ला अधिकारी उमेशकुमार ढकालका अनुसार बकर ईदको समयमा यसअघि पनि त्यहाँ दुई समूहबीच सोही विषयलाई लिएर झगडा हुने गरेको थियो।
‘त्यहाँ पहिले पनि ईदको समयमा दुई समूहबीच झडप हुने गरेको थियो। त्यसैले हामीले यो पटक दुवै समूहलाई प्रहरी कार्यालयमा नै राखेर झगडा नगर्ने सहमति गराएका थियौं’, उनले भने ‘तर, आज बिहान साढे ८ बजे झडप भयो।’
महदैया तपनपुरमा पहिल्यैदेखि मुस्लिम समुदाय दुई भागमा विभाजित रहेको र बुधबार बिहान ईदको अवसर पारेर नवाज पढ्ने क्रममा कुन समूहले पहिले दान दिएर नवाज पढ्ने विषयमा विवाद सुरू भएको थियो।
अहिले सो क्षेत्रमा व्यापक सुरक्षा परिचालन गरिएको छ।