सामाजिक सञ्जालमा प्रधानमन्त्री केपी शर्मा ओलीलाई लक्षित गरि भ्रामात्मक कुरा पोष्ट गर्ने एक जनालाई प्रहरीले पक्राउ गरेको छ।
महानगरीय अपराध अनुसन्धान महाशाखाको टोलीले भक्तपुर सूर्यविनायक नगरपालिका ३ का ४१ वर्षीय होमनाथ सिग्देललाई पक्राउ गरेको हो। सिग्देल काभ्रेको रोसी गाउँपालिका वडा नम्बर ५ का सचिवसमेत हुन्।
सिग्देलले भ्रमपूर्ण, नकारात्मक दृष्टिकोणले अफवाह फैलाएको भन्दै प्रहरीले पक्राउ गरेको हो।
विद्युतीय कारोबार ऐन २०६३ को दफा ४७ बमोजिम विद्युतीय स्वरूपमा गैरकानुनी कुरा प्रकाशन गर्ने कार्यमा संलग्न व्यक्तिलाई १ लाख सम्म जरिवाना वा पाँच वर्षसम्म कैद वा दुबै सजाय हुने व्यवस्था छ।
