विद्यालयको खानेपानी ट्यांकीमा विष पाइएपछि अभिभावक आक्रोशित बनेका छन्।
मोरङ लेटाङ नगरपालिकाको जाँतेस्थित श्री माध्यामिक विद्यालयको खानेपानी ट्याङ्कीमा मंगलबार अज्ञात व्यक्तिले बिष मिसाईदिँदा विद्यालयका २८ विद्यार्थी बिरामी परेका थिए।
उक्त घटनाका दोषी पत्ता लगाएर कारबाहीको माग गर्दै स्थानीय अभिभावक आक्रोशित भएका छन्।
प्रहरीले घटनाका बारेमा अनुसन्धान जारी राखेको बताएको छ।
बिहिबार सञ्चारकर्मीसँग कुरा गर्दै स्थानीय अभिभावकहरूले विद्यार्थीको ज्यानै लिने नियतले गरेको यस्तो कार्य गर्ने/गराउने जो सुकैलाई प्रशासनले कारबाहीको दायरमा ल्याउनुपर्ने माग गरेका हुन्।
मंगलबार बिहान बिद्यालय आएका विद्यार्थीहरू पानी पिउने क्रममा बिरामी परेका थिए।
साना कक्षाका विद्यार्थीले पानी पिउँदा थाहा नपाए पनि ठूला कक्षाका विद्यार्थीले गन्ध आएको थाहा पाएपछि खोजी गर्दा पानी ट्याङ्कीमा विषादिको बोतल भेटिएर घटना बाहिर आएको विद्यालयका शिक्षक खगेन्द्रराज खतिवडाले बताए।
विष हालेको पानी पिएर बिरामी भएका विद्यार्थीलाई तत्काल उपचारको लागि उर्लाबीस्थित मंगलबारे अस्पताल पठाईएको थियो।
विष कसले र किन हाल्यो भन्ने बारेमा अहिलेसम्म केही नखुलको प्रहरीले जानकारी दिएको छ।
साईफर मेथिनको १० प्रतिशत विषादी खानेपानीमा हालेको पाईएको इलाका प्रहरी कार्यालय लेटाङका प्रहरी निरीक्षक युवराज खतिवडाले जानकारी गराए।
घटनामा बिरामी भएका ४ जना विद्यार्थीको विराटनगरस्थित नोबेल अस्पतालमा उपचार भइरहेको छ।
गम्भीर बिरामीमा कक्षा ७ मा अध्ययनरत श्रृष्टी निरौला, कक्षा ९ मा अध्ययनरत खुस्बु मिश्र र कमला लिम्बु तथा कक्षा ५ मा अध्ययनरत मनिष थापा रहेको विद्यालयका प्रधानध्यापक खेमराज दुलालले जानकारी दिए।
विरामी हुने विद्यार्थीमा लेटाङ नगरपालिका वडा नं ८ र ९ मा बस्ने ४ वर्ष देखि १३ वर्ष उमेरका छन्।
सामान्य अवस्थामा रहेका २४ जना बिरामीलाई सोही दिन मंगलबारे अस्पतालले डिस्चार्ज गरेको प्रहरी निरीक्षक खतिवडाले बताए।
घटनापछि लेटाङ नगरपालिकाले एक विज्ञप्ति जारी गरी घटनाको निन्दा र भत्सर्ना गरेको छ।
नगरप्रमुख शंकर राईद्धारा हस्ताक्षरित विज्ञप्तिमा यस्ता निच र घृणित कार्यको निन्दा गर्दै खेद प्रकट गरिएको छ।
प्रधानध्यापक दुलालका अनुसार विद्यालयमा ४ सय ९१ जना विद्यार्थी अध्यायनरत छन्।
यसैबीच पीडित विद्यार्थीका अभिभावकले दोषी पत्ता लगाई कानुनी कारबाही गर्न ईलाका प्रहरी कार्यालय लेटाङमा दवावसमेत दिएका छन्।
ईलाका प्रहरी प्रमुख युवराज खतिवडाले घटनाको बारेमा अनुसन्धान भईरहेको भन्दै चाडोभन्दा चाडो दोषि पहिचान गरि कानुनी दायरामा ल्याउने बताए।
संसदमा बोल्दै सोही क्षेत्रका सांसद घनश्याम खतिवडाले घटनाका बारेमा यदाशिध्र सत्य तथ्य बाहिर ल्याउन माग गरेका छन्।
राष्ट्रिय मानव अधिकार आयोगले पनि घटनाका वारेमा चासो लिएर स्थलगत अनुसन्धान थालेको छ।