हुम्लाको हिल्सामा मनाङ एयरको हेलिकोप्टरको पंखाले लागेर एक जना भारतीय पर्यटकको मृत्यु भएको छ।
मानसरोवर कैलास यात्राका लागि हुम्लाको सिमिकोट एयरपोर्टबाट सोही हेलिकप्टरमा हिल्सा गएका भारत महाराष्ट्रका ४२ वर्षीय नगेन्द्रकुमार कार्तिक मेहतालाई हेलिकप्टरको पंखाले काट्दा मृत्यु भएको नागरिक उड्यान कार्यालय हुम्लाका प्रमुख गौरी शंकर दाहालले सेतोपाटीलाई जानकारी दिए।
दाहालका अनुसार हिल्सामा हेलिकप्टर ल्याण्ड भइसकेपछि अपरान्ह सवा ३ बजे ओर्लिने क्रममा मेहताले सेल्फी खिच्न पछाडितिर गएका बेला हेलिकप्टरको पछाडिको पंखाले उनलाई लागेको हो।
मेहता मुम्बइको एक्प्लोर कैलास ट्रेक प्राइभेट लिमिटेडबाट मानसरोबर जाँदै गरेका व्यक्ति हुन्।
हेलिकप्टरको पनि पछाडिको भाग पूर्ण रूपमा क्षति भएको छ। क्षति भएको हेलिकप्टर लिन फिस्टेल एयरको हेलिकप्टर पठाइएको उनले जानकारी दिए।
हेलिकप्टर सिमिकोटबाट उडेर नाख्या-१ को हेलिप्याडमा ल्यान्ड भएको थियो। उनको शव सिमिकोट ल्याउन लागिएको प्रहरीले जनाएको छ।