जुम्लाबाट आएको पाँच दिनपछि अनसनरत डाक्टर गोविन्द केसीको रगत परीक्षण गरिएको छ।
आफ्नी ८० वर्षीया आमा मित्र कुमारी केसीको आग्रहमा उनको रगत परीक्षण गरिएको हो।
काठमाडौं ल्याइए पनि उनले स्वास्थ्य परीक्षण गर्न मानेका थिएनन्।
हिजो साँझ आफ्ना छोरालाई भेट्न आएकी आमा स्वास्थ्य परीक्षण पनि नभएको कुरा थाहा पाउना साथ दुखी भएकी थिइन्। भेट्दा केही नभने पनि पछि टेलिफोनमार्फत् भावुक हुँदै छोरालाई कमसेकम स्वास्थ्य परीक्षण गराउन आग्रह गरेकी थिइन्।
उनको स्वास्थ्य स्थिति चिन्ताजनक हुँदै गएको उनको उपचारमा संलग्न डा. दिव्या सिंह शाहले जानकारी दिइन्।
चिकित्सकका अनुसार रगतको रिपोर्टमा सम्पूर्ण प्यारामिटरहरू असामान्य छन्।
सेतो रक्तकोशिकाको संख्या अहिलेसम्मकै न्यून देखिएको छ। यति कम सेतो रक्तकोशिका भएका बिरामीलाई यदि कुनै संक्रमण भइहाले , त्यसले भयावह रूप लिने बताइएको छ।
रगतमा ग्लुकोजको मात्रा पनि अहिलेसम्मकै सबैभन्दा न्यून देखिएको छ। विशेषत ग्लुकोजको मात्रा घटेसँगै सबभन्दा गम्भीर असर ब्रेनमा देखिन्छ । स्नायुहरू शक्तिहीन बन्दै जान्छन् र बेहोस हुने , सिजर हुने अर्थात छारे रोगका लक्षणहरू पनि देखिन सक्छ।
जुम्लामा रहँदै घटेको पोटासियम, म्यागनेजियम र क्यालसियमको मात्रा अझै बढेको छैन। विशेषत पोटासियम एकदमै न्यून छ। उपचारमा संलग्न चिकित्सकहरूका अनुसार , यही अवस्था भए डा.केसीको मुटु जुनसुकै बेला पनि बन्द हुनसक्छ ।
रगतमा अक्सिजनको मात्रा निरन्तर घटिरहेको छ। एकैछिन पनि अक्सिजन नलगाउदा उहाँलाइ निकै अप्ठ्यारो हुन्छ। ‘अक्सिजन कम भएसँगै छाती पनि बेस्सरी दुख्ने गरेको छ’,उनका भाइ किशोर केसीले बताए।
२४ दिन लामो सत्याग्रहका कारण शक्तिहीन बनेका डा.केसी दोहोरो संवाद पनि गर्न नसक्ने अवस्थामा छन् ।
