महानगरीय प्रहरी परिसर ललितपुरले सिटिजन्स बैंकको सहकार्यमा उत्कृष्ट काम गर्ने प्रहरीलाई प्रत्येक महिना पुरस्कृत गर्ने भएको छ।
प्रहरी कर्मचारीहरूलाई अझ बढी जिम्मेवार तथा कामप्रति उत्तरदायी बनाउन उच्च मूल्याङ्कन र पुरस्कृत गर्ने लक्ष्यले प्रत्येक महिना तीन जना प्रहरीलाई जनही २० हजार रुपैयाँले पुरुस्कार दिने भएको हो।
पुरस्कारको लागि महानगरीय प्रहरी परिसर ललितपुरले वार्षिक ७ लाख २० हजार रुपैयाँको कोष खडा गर्ने बैकसँग सम्झौता गरेको छ।
गत महिना उत्कृष्ट कार्यसम्पादन गर्ने प्रहरी निरीक्षक खुमलाल भुसाल, चन्चला श्रेष्ठ र प्रहरी सहायक निरीक्षक मिनबहादुर तामाङलाई पुरस्कृत गरेको हो।
