विगत २० दिनदेखि अनसनरत डाक्टर गोविन्द केसीलाई काठमाडौं लैजान आएको भन्दै गाउँ गाउँबाट आएका आमा समूहसहितको स्थनीय गाउँलेको टोलीलाई प्रहरीले बीच बाटोमै रोकेको छ। अहिले सदरमुकाम भित्रने कुनै पनि सवारी साधन प्रवेश निषेध गरिएको छ।
आमा समूह र विद्यार्थी विरोधमा उत्रिएपछि डा.केसीलाई लिन गएको सरकारी टोली पछि हटेको थियो। विगत २० दिनदेखि चिकित्सा क्षेत्रको सुधारका लागि जुम्लामा अनसनरत डा. गोविन्द केसीलाई लिन प्रदेश नम्बर ६ का मुख्य मन्त्री महेन्द्रबहादुर शाही र आन्तरिक मामिला तथा कानुनमन्त्री नरेश भण्डारीसहितको सरकारी टोली आर्मीको हेलिकप्टर लिएर गएको थियो।
डाक्टर केसीको माग पुरा नभएसम्म उनलाई जुम्लाबाट बाहिर लैजान नदिने भन्दै गाउँ गाउँबाट आमा समूह सदरमुकाम आउने क्रममा छन्।
डा केसीको पछिल्लो स्वास्थ्य अवस्था कमजोर बन्दै गएको जानकारी पछि सरकारले बुधबार राति उनलाई लिन हेलिकप्टर पठाउने निर्णय गरेको थियो।
डा. केसीका जायज मागहरू पुरा गराउन माग गर्दै देशभरका चिकित्सकहरू यतिबेला आन्दोलित भइरहेका छन्।
