सरकारले अनशनरत डा. गोविन्द केसीलाई लिन पठाएको हेलिकप्टर बिहीबार बिहान जुम्ला पुगेको छ।
शिक्षा, विज्ञान तथा प्रविधि मन्त्री गिरिराजमणि पोखरेलले पत्रकार सम्मेलन गरेर डा. केसीलाई लिन हेलिकप्टर पठाइएको जानकारी दिएका हुन्। हेलिकप्टरमा स्वास्थ्य विभागका महानिर्देशक डा. गुणराज लोहनीलाई पनि पठाइएको पोखरेलले जानकारी गराए।
हेलिकप्टरमा पुगेको सरकारी टोली डा. केसीसम्म पुग्न नदिन विद्यार्थीहरूले मानव साङ्ग्लो बनाएर रोकेका छन्।
कर्णाली स्वास्थ्य विज्ञान प्रतिस्ठानमा ठूलो मात्रामा सुरक्षाकर्मी खटाएर सरकारले जबरजस्ती लैजाने तयारी गरिरहेको त्यहाँ उपस्थित एक समर्थकले जानकारी दिए। विद्यार्थीहरुले सुरक्षाकर्मी लगायत सरकारी अधिकारीहरुलाई भित्र पस्न दिएका छैनन्। डाक्टर केसीले पनि माग पूरा नभएसम्म काठमाडौं नजाने बताएका छन्।
‘सरकारले डा. केसीलाई जबरजस्ती अपहरण शैलीमा उठाएर लैजाने तयारी गर्दैछ। यो गुण्डागर्दी शैली तत्काल बन्द गरियोस्,’ केसी समर्थकले भने।
यो पनि पढ्नुहोस:
डाक्टर केसीको सरकारलाई जवाफ-म चन्दननाथ बाबाको काखमा छु, मलाई अपहरण नगरियोस् (भिडियो)
डा. केसी अनशनरत कर्णाली स्वाथ्य विज्ञान प्रतिष्ठानले उनको उपचार अब आफूहरुले गर्न सक्ने अवस्थामा नरहेको बताए भन्दै बुधबार राति बसेको नेकपाको आकश्मिक बैठकले डा. केसीलाई ल्याउने निर्णय गरेको थियो।
तर जुम्ला सदरमुकाममा डा. केसीको समर्थनमा सयौं संख्यामा सर्वसाधारण उपस्थित भएर सरकारी कदमको विरोध गरिरहेका छन्। डा केसीले बिहान भिडियोमार्फत बोल्दै आफूलाई अपहरणको शैलीमा उठाएर काठमाडौं लैजान लागिएको भन्दै त्यसको विरोध गरेका थिए।
चिकित्सा शिक्षा विधेयक अध्यायादेश अनुसार नै हुनु पर्नेसहितका माग गरेर डा. केसी अनशनमा छन्।
