प्रहरीले त्रिभुवन अन्तर्राष्ट्रिय विमानस्थलबाट २ सय ५५ ग्राम सुनसहित २ जना भारतीयलाई पक्रेको छ।
मंगलबार दुबईबाट काठमाडौं आएका भारतीय नागरिक रहिस अहमद र मोहम्मद अजामलाई प्रहरीले विमानस्थलबाट पक्राउ गरेको हो।
अहमदबाट एक सय १६ र अजामसँग एक सय ३९ ग्राम सुन बरामद भएको विमानस्थल प्रहरी प्रवक्ता एसपी दिनेशराज मैनालीले जानकारी दिए।
उनका अनुसार दुबै जनाले सुनका टुक्रा मुखभित्र लुकाएर ल्याएका थिए। विमानस्थल भित्र केही नबोली इशाराको भरमा निस्किएको देखेपछि प्रहरीले उनीहरूलाई नियन्त्रणमा लिएको थियो।
पक्राउ परेका दुबै जनाबारे आवश्यक अनुसन्धानपछि राजश्व विभागमा बुझाउने प्रहरीले जनाएको छ।
