मनकामना केबुलकारले निरन्तर चौंथो वर्ष पनि उत्कृष्टताको प्रमाणपत्र (सर्टिफिकेट अफ एक्सीलेन्स) पाएको छ।
सेवाग्राहीको मूल्यांकनका आधारमा विश्वको ठूलो र विश्वसनीय ट्राभल साइट ट्रिप एड्भाइजरले मनकामना केबुलकारलाई सन् २०१८ का लागि उत्कृष्टताको प्रमाणपत्र दिएको हो।
प्रसिद्ध धार्मिकस्थल गोरखाको मनकामना मन्दिर आवतजावत गर्ने भक्तजनलाई लक्षित गरी चितवनको इच्छाकामना गाउँपालिका कुरिनटारदेखि गोरखाको शहीद लखन गाउँपालिका मनकामनासम्म केबुलकार सञ्चालित छ।
सेवाग्राहीको मूल्यांकनको आधारमा उच्च प्रशंसा प्राप्त गर्न सफल भएकाले मनकामना केबुलकारलाई सर्टिफिकेट अफ एक्सीलेन्स प्रदान गरिएको ट्रिप एड्भाइजरले जनाएको छ।
‘ग्राहकको वास्तविक मूल्यांकनका आधारमा हामीले यो प्रमाणपत्र पाएका हौं” मनकामना दर्शन प्रालिका कार्यकारी निर्देशक राजेशबाबु श्रेष्ठले भने, ‘सन् २०१५ देखि निरन्तर उत्कृष्टताको प्रमाणपत्र पाइरहेका छौं।’
ट्रिप एड्भाइजरको वेबसाइटमा चीन, भारत, बंगलादेश, इंग्ल्याण्ड, संयुक्त अरब इमिरेट्सलगायत देशबाट नेपाल आएर मनकामना केबुलकार चढेका यात्रुले मनकामना केबुलकारबारे मूल्याङ्कन गरेका हुन्।
नब्बे जना मूल्याङ्कनकर्तामध्ये ६४ जनाले उत्कृष्ट, १७ जनाले धेरै राम्रो, तीन जनाले औसत, दुई जनाले कमजोर र चार जनाले डरलाग्दो भनि मूल्यांकन गरेका छन्।
पाँच अंकको समग्र मूल्यांकनमा मनकामना केबुलकारले चार दशमलव पाँच अंक प्राप्त गरेको श्रेष्ठले बताए।
भक्तजनका साथै मनकामना क्षेत्रका स्थानीय बासिन्दालाई केबुलकारले यातायातमा सेवा दिँदै आएको छ।
