नेपाल खाद्य संस्थानको भद्रकालीस्थित जग्गामा निर्माण भइरहेको फलामे ट्रष्टको भवन ११ नम्बर वडाले रोक्का गरेको छ।
वडाको जानकारीबिना संरचना निर्माण सुरू भएको र महानगरलाई बुझाउन पर्ने बक्यौता नबुझाएकोले काम रोक्नु परेको वडाध्यक्ष हिरालाल तण्डुकारले बताएका छन्।
संस्थानले आफ्नो जग्गा निजी प्रयोगकर्तालाई भाडामा दिएको छ। अहिले निर्माण भइरहेको संरचनामा संस्थान आफैंको नभइ व्यापारिक क्षेत्रको लगानी छ।
महानगरले निर्माण कार्य रोक्का गरेपछि थप काम हुन सकेको छैन। यसअघि सवारी चलाउन सिकाउने तालिम सञ्चालन भइरहेको यो क्षेत्र करिब ७ रोपनी क्षेत्रफलमा फैलिएको छ।
संस्थानले कर तिर्ने रकम आफूसँग नभएको बताउँदै आएको छ भने महानगर कानूनबमोजिम तिर्नुपर्ने कर नतिरी र प्रचलित मापदण्डबमोजिम भवन नक्सा स्वीकृत नगरी भवन निर्माण कार्य फुक्का गर्न सक्ने अवस्थामा छैन।
वडाका अनुसार संस्थानले महानगरलाई कर बक्यौताबापत करिब ७ करोड रुपैयाँ बुझाउन बाँकी छ।
