आमालाई कुटपिट गरी हत्या गरेको आरोपमा प्रहरीले गोरखाको भीमसेन गाउँपालिका १ मसेलका ३२ वर्षीय राजेश विश्वलाई नियन्त्रणमा लिएर कारबाही सुरू गरेको छ।
छोराको कुटपिटबाट ६३ वर्षकी आमा बिबा विश्वको असार ८ गते मृत्यु भएको थियो।
असार ९ गते बिबाको शव जलाउन दरौंदी नदी किनारस्थित घाट पुगेका छोरासहित १८ जना मलामीलाई प्रहरीले नियन्त्रणमा लिएको थियो। बिबाको हत्या भएको आशंकामा प्रहरीले शव नियन्त्रणमा लिएको हो।
बिबाको टाउको, हातगोडा र अनुहारमा चोट थियो। जलाउन लागेको शव प्रहरीले नियन्त्रणमा लिएर पोस्टमार्टमका लागि गोरखा जिल्ला अस्पताल ल्याएको थियो।
कुटपिटबाट बिबाको मृत्यु भएको पोस्टमार्टमबाट देखिएपछि छोरासहित मलामीविरुद्ध कारबाही सुरू गरेको जिल्ला प्रहरी कार्यालय गोरखाले जनाएको छ।
शव सदगत गर्न लैजाने छोरा राजेशसहित १८ जना मलामीलाई कर्तव्य ज्यान शीर्षकमा आइतबार मुद्दा दर्ता गरी थप अनुसन्धान सुरू गरेको प्रहरी नायब उपरीक्षक भेषराज रिजालले जानकारी दिए।