क्यान्सर अस्पताल भक्तपुरले क्यान्सर रोगीको लागि ‘सर्भाइभर क्लब’ सञ्चालन गरेको छ।
शनिबार अस्पतालको प्राङ्गणमा एक कार्यक्रमको आयोजना गर्दै हाँस्य कलाकार मदनकृष्ण श्रेष्ठले क्लबको उद्घाटन गरेका हुन्।
क्यान्सर अस्पतालको ‘सर्भाइभर क्लब’ उद्घाटनको लागि पुगेका वरिष्ठ कलाकार मदनकृष्णले भावुक हुँदै परिवारमा क्यान्सर लाग्दाको पीडा व्यक्त गरे । केही समय पहिला क्यान्सर रोगबाट नै मदनकृष्णको श्रीमतीको पनि मृत्यु भएको थियो।
प्रमुख अतिथि श्रेष्ठले फलफूल, माछा, मासुमा विभिन्न विषादी मिसावट हुने गरेको तर नेपालीले त्यही ढुक्क भएर खाने गरेका कारण स्वास्थ्यमा समस्या देखिने गरेको बताए।
उनले हाँस्य व्यङ्ग्य शैलीमै भने, ‘पछिल्लो समय अत्यधिक औषधि प्रयोग गरेको कारण अमला कागती जत्रो देखिन्छ । कागती सुन्तला जत्रो देखिन्छ । अनि सुन्तला भोगटे जत्रो देखिन्छ । तर, भोगटे चै फेरि सुन्तला जत्रो देखिन्छ। दैनिक सेवन गर्ने खाद्य सामानमा बढी औषधि प्रयोग गर्दा नेपालीहरू रोगको सिकार हुनु परेको छ।’
मोटरसाइकलको लाइसेन्स रिन्यू गरेको जस्तै वर्षैनी विदेशी नागरिकले स्वास्थ्य परीक्षण गराउँदै आएको उदाहरण दिँदै नेपाली पनि अब स्वस्थ रहन अनिवार्य वर्षमा एक पटक स्वास्थ्य जाच गर्न आग्रह गरे।
‘मेरो श्रीमतीको उपचारको लागि धेरै पटक डाक्टरले मलाई बोलाएका थिएँ। तर म आफ्नै कार्य व्यस्तताले गर्दा जान सकिनँ अस्पताल जाँदा निकै ढिलो भइसकेको थियो’ भावुक हुँदै श्रेष्ठले थपे ‘आफ्नो परिवारलाई क्यान्सर लाग्दा कति पीडा हुन्छ भन्ने कुरा जसलाई पर्र्यो उसैलाई मात्रै थाहा हुन्छ । एकदम छटपटी हुन्छ । छागाबाट मात्रै होइन, हवाईजहाजबाट खसे जस्तै हुन्छ।’
नेपालमा उपचार गर्दा सस्तो सुलभ,प्लेन खर्च होटल खर्च देखि अर्काको देशमा असुरक्षित महशुस आफ्नो देशमा नहुने हुँदा आफ्नै देशमा उपचार गर्न आग्रह गरे।
के हो ‘सर्भाइभर क्लब’ ?
कुनै पनि क्यान्सर बिरामीले आफ्नो रोगको बारेमा अर्को क्यान्सर रोगीसँग खुलेर कुरा गर्न सकोस् र एक क्यान्सर रोगीले अर्को रोगीलाई उपचारको बारेमा सहजता प्रदान गरोस् भन्ने लक्ष्यका साथ क्लब सञ्चालन गरिएको हो।
डाक्टर रोशन प्रजापतिको संयोजनमा सञ्चालन गरिएको क्लबमा क्यान्सर बिरामीलाई क्यारिङबोट,लुडो,लगुरबुर्जा लगायत मनोरञ्जन प्रदान गर्ने खेलको पनि व्यवस्था गरिएको छ।
उपचारपछि पनि क्यान्सर रोगीमा मानसिक र शारीरिक चुनौतीहरू हुन सक्छन्। बिरामीको आत्मबल बढाउन र बिरामीको सकारात्मक सोचको लागि सभार्इभर क्लब सञ्चालन गरिएको डाक्टर प्रजापतिले बताए।
क्लब अबदेखि शनिबार सञ्चालन गरिने बताइएको छ।