चीनको सिचुआन प्रान्तका विकास र पर्यटन आयोगका उपप्रमुख चाओ क्वीनले गरिवी निवारणसम्बन्धी सरकारको रणनीतिक योजना र कार्यक्रम कार्यान्वयनमा आम सञ्चार माध्यमको ठूलो भूमिका रहने बताएका छन्।
सिचुआन प्रान्तको विदेश विभाग कार्यालयद्वारा नेपाली पत्रकारका लागि आयोजित तालीम र अनुभव आदान प्रदान कार्यक्रमको शुभारम्भ गर्दै उनले आदिवासी तथा पछि परेका समुदायको जीवनस्तर उकास्न घोषणा गरिएका कार्यक्रमलाई सफल बनाउन सञ्चार क्षेत्रले हरतरहले सहयोग पुर्याउनुपर्ने बताए।
उक्त प्रान्तका गरिवी निवारण र अध्यागमन ब्युरोका उपप्रमुख लुओ युले प्राकृतिक स्रोत साधनको समुचित प्रयोग र ऐतिहासिक धरोहरको संरक्षण नै विकास र समृद्धिको आधार भएको बताए।
चीनको विदेश मन्त्रालयको आन्तरिक सुरक्षा विभागका कन्सुलर झिङओ मिङले नेपाल र चीन निकै घनिष्ठ र असल सम्बन्ध रहेको छिमेकी भएको बताए।
‘नेपालले चीनको स्वसासित क्षेत्र तिब्बतको सुरक्षा संवेदनशीलतालाई उच्च प्राथमिकता दिएको छ, जुन कार्यका लागि चीनले सधैं यसको प्रशंसा गर्दै आएको छ,’ उनले भने।
प्रधानमन्त्री केपी शर्मा ओलीको चीन भ्रमणबाट दुई देशबीचको सम्बन्ध अघि बढाउन कोशेढुङ्गा सावित हुने कन्सुलर झिओङ मिङले उल्लेख गरे।
काठमाडौंसँग भगिनी सम्बन्ध रहेको चीनको बेइजिङ र सांघाइपछिको ठूलो विमानस्थल रहेको छेन्दुले पछिल्लो समय पूर्वाधार निर्माण र सूचना प्रविधिको विकासमा जोड दिएको छ । १३ दिने उक्त तालीममा १५ जना नेपाली पत्रकार सहभागी छन् ।