मुस्ताङको पवित्र धार्मिकस्थल मुक्तिनाथमा योग शिविर चलिरहेको छ। भारतीय प्रधानमन्त्री नरेन्द्र मोदीको भ्रमणपछि थप प्रचारमा आएको मुक्तिनाथमा काठमाडौंस्थित भारतीय दूतावासको आयोजनामा नियमित योग भइरहेको हो।
चौथो अन्तर्राष्ट्रिय योगा दिवसको अवसरमा दूतावासले १२ हजार ५०० फिट उचाईमा अवस्थित मुक्तिनाथ मन्दिर परिसरमै योगा क्याम्प सञ्चालन गरेको हो।
योगा क्याम्पमा यहाँका भिक्षुका साथै स्थानीयको उल्लेख्य संख्यामा सहभागिता रहेको दूतावासले जनाएको छ ।
धार्मिक पर्यटनको सम्भावना बोकेको मुक्तिनाथमा अब नियमित योग हुने मन्दिर समितिले जनाएको छ।
भारतीय प्रधानमन्त्री नरेन्द्र मोदीले मुक्तिनाथ भ्रमण गरेर फर्किएको एक महिनापछि भारतीय दूतावासले योगा क्याम्प सञ्चालन गरेको हो ।
मोदीले नेपाल भ्रमणको क्रममा गत वैशाख २९ गते मुक्तिनाथको दर्शन गरेका थिए ।त्यसयता यहाँको धार्मिक पर्यटनले गति लिन थालेको स्थानीयहरु बताउँछन्।