ठूलो मात्रामा नक्कली सामान विक्री गरेको आरोपमा पर्सा प्रहरीले पूर्वसांसद अनिल रुंगटाका कान्छो भाइ अनुज रुंगटालाई पक्राउ गरेको छ।
नेपाली कांग्रेसका तर्फबाट समानुपातिक सांसद बनेका अनिल रुंगटा वीरगन्जकै ठूलो औद्योगिक घरानाको जगदम्बा कम्पनीका साझेदार सञ्चालक सदस्य समेत रहेका छन्।
भारतीय कम्पनीले निर्माण गर्दै आएको नक्कली सामान चाइनाबाट मगाएर नेपाली बजारमा विक्री गरेको आरोपमा जिल्ला प्रहरी कार्यालय पर्साले रुंगटालाई पक्राउ गरेको हो।
भारतीय जेके कम्पनीले निर्माण गरेको ड्रिल मेशिनको नक्कली बिल चाइनाबाट आयात गरेर नेपाली बजारमा विक्री गरेको प्रहरीको अनुसन्धानबाट खुल्न आएको छ।
चाइनाबाट आयातित नक्कली समान जेके कम्पनीको ब्रान्डमा विक्री भएको उजुरीको पत्र भारतीय दूतावासबाट नेपाली प्रहरीमा पुगेपछि प्रहरीले अनुसन्धान अगाडि बढाएको जनाएको छ।
अनुज रुंगटालाई अनुसन्धानको लागि जिल्ला प्रहरी कार्यालय पर्सामा ल्याइएको प्रहरी नायब उपरीक्षक रञ्जन लिम्बुले बताए।
उनले भने ‘अनुसन्धानको लागि ल्याइएको हो,हामी सोधपुछ गरिरहेका छौ ।
