७ नम्बर प्रदेशको राजधानी धनगढीमा दिनदहाडै गोली प्रहार गरी नौ लाख ५० हजार रकम लुट्ने लुटेरालाई प्रहरीले मंगलबार सार्वजनिक गरेको छ ।
जिल्ला प्रहरी कार्यालय कैलालीले आज पत्रकार सम्मेलन गरी लुटेको रकम मध्ये पाँच लाख ४८ हजार ६ सय नगदसहित लुटपाटमा संलग्न पाँच जनालाई सार्वजनिक गरेको हो।
लुटपाट घटनाका मुख्य योजनाकारसहित उनीहरुले लुटपाटमा प्रयोग गरेको ६ राउण्ड गोलीसहित पेस्तोल र मोटरसाईकल प्रहरीले सार्वजनिक गरेको हो।
मुख्य योजनाकार धनगढी उपमहानगरपालिका–६ जालीका राजकुमार चौधरी, कञ्चनपुरको बेलौरी नगरपालिकाका ३० बर्षीय उग्रसेन राना, कञ्चनपुरकै कृष्णपुर–९, पिपरियाका २३ वर्षीय कल्लु भनिने कालु राना र धनगढी उपमहानगरपालिका–१३, कैलाली गाउँका २८ वर्षीय राम प्रवेश राना छन्।
पत्रकार सम्मेलनमा बोल्दै एसएसपी हरिराज वाग्लेले लुटेराले धेरै दिनको निगरानी गरेर घट्नाको योजना बनाई घट्नालाई अन्तिम रुप दिएको दाबी गरे।
गोली प्रहार गरि लुटपाटमा संग्लनहरू लामो समयदेखि अपराधिक कृयाकलापमा संग्लन भएको र उनीहरुले विभिन्न घटना घटाएको जिल्ला प्रहरी कार्यालय कैलालीका प्रहरी प्रमुख बिनोद घिमिरेले बताए।
घटनामा संलग्न भई आईएमईका कर्मचारीमाथि गोली प्रहार गर्ने कल्लु राना यसअघि पनि जबरजस्ती करणी मुद्दामा ६ वर्ष कैद भुक्तान गरी २०७४ माघमा छुटेका व्यक्ती हुन्। यस्तै अर्का उग्रसेन राना पनि डाँका चोरी मुद्दामा ४ वर्ष ८ महिना जेल परेका व्यक्ति हुन्।
योजनाकार राजकुमार चौधरी पनि हातहतियार खरखजाना मुद्दामा ७५ दिन कैलाली कारागारमा बसी २०६५ सालमा छुटेका व्यक्ति भएको घिमिरेले बताए।
यही जेठ १३ गते केन्ट ट्रेडर्स एण्ड सप्लायर्स का कर्मचारी निर्मल कार्कीले सिद्धार्थ बैंकबाट झोलामा बोकी साईकलमा ल्याउँदै गरेको ९ लाख ५० हजार रूपैया धनगढीको पुरानो सब्जीमण्डीमा गोली प्रहार गरी लुटिएको थियो।