तस्करीको ३३ किलो सुन र सनम शाक्य हत्या काण्डका मुख्यअभियुक्त चुडामणि शर्मा 'गोरे' लाई प्रहरीले सार्वजनिक गरेको छ।
गृह मन्त्रालयले बनाएको छानबिन समितिले मंगलबार दिउँसो पत्रकार सम्मेलन गरेर गोरेलाई सार्वजनिक गरेको हो।
पत्रकार सम्मेलनको सुरूमा गोरेको मुखमा कालो पट्टी बाँधेको थियो। उनले चश्मा र रातो टोपी लगाएका थिए। अभियुक्तको अनुहार नचिनियोस् भनेर प्रहरीले यसरी पट्टी बाँधिदिने गर्छ।
गोरेलाई क्यामेरासामू ल्याएपछि पत्रकारले उनले लगाएको टोपी हटाइदिन प्रहरीलाई अनुरोध गरेका थिए।
पत्रकारको अनुरोध सुनेका गोरे आफैंले टोपी निकालिदिए र ह्या भन्दै मुखमा बाँधिएको कालो पट्टी पनि खोलिदिए।
मन्त्रालयमा आयोजित पत्रकार सम्मलेनमा समिति संयोजक सहसचिव ईश्वरराज पौडेलले उनलाई आजै जिल्ला अदालत मोरङमा पेश गरिने जानकारी दिए।
'मुख्य अभियुक्त भएकाले उनलाई आजै अदालतमा पेश गर्छौं,' संयोजक पौडेलले भने, 'सुन तस्करी जेरीजस्तै जेलिएको छ। हामीले थप सूचना पनि पाएका छौं। त्यसको अनुसन्धान जारी राख्छौं।'
पौडेलले गोरेलाई काठमाडौंको गौरीघाटबाट मंगलबार बिहान पक्राउ गरिएको बताए।
