बाटो खुलेको २० वर्षपछि जलजला गाउँपालिकाको मोहनचोकदेखि मल्लाज जोड्ने सडक स्तरोन्नतिको काम सुरू भएको छ।
बेनी–मालढुंगा सडकको मोहनचोक खण्डदेखि मल्लाजको कोटघर जोड्ने आठ किमी दूरीको सडक फराकिलो र नाली बनाउने काम सुरू भएको ४ नम्बर वडाध्यक्ष भीष्म मल्लले जानकारी दिए।
चालू आर्थिक वर्षमा उक्त योजनाका लागि गाउँपालिकाले ९० लाख रुपैयाँ विनियोजन गरेको छ। हाल साढे तीन मिटर चाक्लो रहेको सडक कम्तीमा सात मिटर फराकिलो बनाउनाका साथै नालीसमेत निर्माण गरिने अध्यक्ष मल्लले बताए। ‘ग्याबिन र पक्की पर्खाल निर्माणको काम भइरहेको छ’, उनले भने। उपभोक्ता समितिमार्फत दुई कार्यक्रमबाट सडक स्तरोन्नति आयोजना सञ्चालन हुनेछ। विसं २०५४ मा बाटो खुलेको मोहनचोक मल्लाज सडक सामान्य मर्मतका भरमा सञ्चालन हुँदै आएको थियो।
सो आयोजनाबाट जलजला गाउँपालिका वडा नम्बर १, २, ३, ४ र ५ नंमा पर्ने बाँसखर्क, मल्लाज र लेकफाँटका साथै अन्नपूर्ण गाउँपालिका– ८ राम्चेका बासिन्दा लाभान्वित हुने उपभोक्ता समितिका सचिव नवीन जिसीले बताए।
यसैगरी, जलजला– ४ को पाल्सिङदेखि खोलाखेत जोड्ने एक किमी १०० मि सडकको बाटो खोल्ने काम सकिएको छ। चार नम्बर वडाकै फड्केढुंगा पिडाल्ना हुँदै लेकफाँट रात्माता जोड्ने सडकको अरजेटको भीरमा बाटो खन्ने काम भइरहेको छ। सो योजनाका लागि गाउँपालिकाले यस वर्ष ४५ लाख रुपैयाँ विनियोजन गरेको वडा सदस्य हरिबहादुर कार्कीले बताए।
जलजला गाउँपालिकाका प्रमुख प्रशासकीय अधिकृत कृष्णप्रसाद गौतमले गाउँपालिकाले बजेट विनियोजन गरेका ३० मध्ये २९ योजनाको सम्झौता भइसकेको जानकारी दिए। आठ र ९ नम्बर वडामै पुगेर योजना सम्झौता गरिएको जानकारी दिँदै उनले अन्य वडाका योजनासमेत कार्यान्वनको चरणमा रहेको बताए।
८० प्रतिशत योजना सम्झौता भएको छ। चालू आवमा सञ्चालन हुने योजना तथा कार्यक्रमका लागि करिब १२ करोड ९५ लाख बजेट विनियोजन भएकामा नौ महिनाका अवधिमा पूँजीगततर्फको ३५ प्रतिशत बजेट खर्च भएको प्रमुख प्रशासकीय अधिकृत गौतमले जानकारी दिए।
बेनी अस्पतालको उपचार कक्ष भवन
सदरमुकाममा रहेको बेनी अस्पतालमा करिब एक करोड रुपैयाँको लागतमा २६ शय्या क्षमताको उपचार कक्ष भवन निर्माण भएको छ। स्वास्थ्य मन्त्रालय र अस्पताल विकास समितिको ८७ लाख रुपैयाँको लागतमा अन्तरंग विभागको भवन निर्माण भएको हो। पचास शय्या क्षमताको नयाँ भवन निर्माणका लागि अस्पतालको अन्तरंग विभागको पुरानो भवन भत्काइएको थियो।
अस्पताल विकास समितिका अध्यक्ष माधवप्रसाद रेग्मीले करिब छ महिनादेखि जनस्वास्थ्य कार्यालयको भूइँतलाबाट सञ्चालन हुँदै आएको अन्तरंग विभागलाई शुक्रबारदेखि नयाँ भवनमा स्थानान्तरण गरिएको बताए।
मन्त्रालयको ७३ लाख र अस्पतालको १४ लाखकोे लगानीमा निर्माण भएको एक एकतले पक्की भवनमा २६ शय्या छन् । अन्तरंग, शल्यक्रिया, प्रसूति, गर्भपतन, सुत्केरी र शल्यक्रिया गरेका बिरामीका लागि छुट्टाछुट्टै कोठामा शय्याको व्यवस्था गरिएको अस्पतालका निमित्त प्रमुख डा विराट् शर्माले बताए।
नयाँ भवन बनेपछि काम गर्न सजिलो र बिरामीलाई सहज रुपमा उपचार सेवा दिन सकिने डा शर्माले बताए। बेनी अस्पतालमा गत मंसिरदेखि शहरी विकास तथा भवन निर्माण डिभिजन कार्यालय बागलुङमार्फत करिब १८ करोड ८४ लाखको लागतमा पँचास शय्या क्षमताको भवन निर्माण सुरू भएको थियो।रासस
