मोरङका १५ स्थानीय तहमा दमकल छैन। झट्ट आगलागी हुँदा निभाउने यन्त्र नै नभएपछि जिल्लावासी अन्य जिल्लामा दमकल बोलाउन बाध्य छन्। बाँकी दुई स्थानीय तहमा वारुणयन्त्र छन्।
बेलबारी, सुनवर्सी, लेटाङ, उर्लाबारी, रंगेली, रतुवामाई, पथरीशनिश्चरे नगरपालिका र जहदा, धनपालथान, मिक्लाजुङ, केरावारी, ग्रामथान, कानेपोखरी, बूढीगंगा, कटहरी गाउँपालिकामा वारुण यन्त्र छैनन्। मोरङ प्रहरी प्रमुख अरुणकुमार बिसीका अनुसार जिल्लाका विभिन्न स्थानमा आगलागी हुँदा निभाउन अरू जिल्लाका दमकल बोलाउनुपर्छ ।
जिल्लामा गत वर्षको पुसदेखि हालसम्म एक वर्षमा ६२ स्थानमा आगलागी हुँदा ६४ वटा घर पूर्णरुपमा नष्ट भए । प्रहरीका अुनसार उद्योग र व्यापारिक क्षेत्र गरेर सात ठाउँमा भएको आगलागीले क्षति भएको छ ।
त्यसैगरी, सामुदायिक स्कूल एवम् वनमा पनि आगलागी भएका छन्। आगोमा परेर चार जनाको मृत्यु भयो भने तीनजना घाइते भएका थिए। ती घटनामा २७ चौपाया मरे भने पाँचवटा घाइते भए। आगोले करीब २६ करोड रुपैयाँ बराबरको क्षति भयो। मोरङको विराटनगर महानगरपालिका र सुन्दर हरैचा नगरपालिकासंग मात्र वारुणयन्त्र रहेका छन्।
