संविधानले परिकल्पना गरे अनुसारको राज्य निर्माण गर्न एमालेसँग एकीकरण:अध्यक्ष दाहाल

बुधबार बुद्धनगरस्थित एक पार्टी प्यालेसमा नेकपा माअोवादी केन्द्रका अध्यक्ष पुष्पकमल दाहाल र नेकपा संयुक्त पार्टीका अध्यक्ष गणेश साह पार्टी एकता घोषणासम्बन्धी पत्रमा हस्ताक्षरपछि हात मिलाउँदै।तस्बिर: अनिश रेग्मी/सेतोपाटी


नेकपा माओवादी केन्द्रका अध्यक्ष पुष्पकमल दाहालले संविधानले परिकल्पना गरे अनुसारको राज्य निर्माण गर्न एमालेसँग एकीकरण गर्ने निर्णय लिनु परेको स्पष्ट पारेका छन्।

अध्यक्ष दाहालले एमाले र नयाँ शक्ति पार्टी, नेपालसँग पार्टी एकीकरणका लागि ठूलो बहस हुने र त्यसले संविधानले परिकल्पना गरे अनुसारको समाजवाद उन्मुख राज्य निर्माणका लागि आवश्यक वैचारिक र भौतिक आधार तयार पार्ने दाबी समेत गरे।

बुधबार गणेश साह नेतृत्वको नेकपा संयुक्तसँग पार्टी एकीकरण घोषणा गर्न आयोजित कार्यक्रममा बोल्दै अध्यक्ष दाहालले एमालेसहितका दलहरूबीच पार्टी एकीकरण गर्ने अभियान सुरू भएको र त्यसले एउटै कम्युनिष्ट केन्द्र बनाउने अभियानलाई साथ दिने विश्वास पनि व्यक्त गरे।

अध्यक्ष दाहालले विश्वमा अब नेपालले समाजवादको नयाँ मोडल दिन सक्ने दाबी समेत गरे। उनले  देशमा २ तिहाई जनमत बामपन्थीहरूको रहेकाले विश्वमा कम्युनिष्ट आन्दोलन रक्षात्मक अवस्थामा रहेको बेला पनि नेपालका कम्युनिष्टहरू भने आक्रामक अवस्था रहेको  स्पष्ट पारे।

अध्यक्ष दाहालले कम्युनिष्ट पार्टीबीचको एकीकरण अभियानलाई पूर्णता दिन जनताको तहसम्मै बहस चलाउने योजना पनि अघि सारे।

Share:

प्रतिकृया दिनुहोस

© 2017 Setopati Sanchar Pvt. Ltd.