नवराज सिलवाल एमाले प्रवेश गर्दै, संघीय सांसदमा लड्ने


नेपाल प्रहरीको डिआइजीबाट राजीनामा दिएका नवराज सिलवाल एमाले पार्टी प्रवेश गर्ने भएका छन्।

स्रोतका अनुसार शुक्रबार नयाँ बानेश्वरस्थित क्वालिटी ब्यांकेटमा एक कार्यक्रमबीच एमाले अध्यक्ष केपी शर्मा ओलीले सिलवाललाई एमालेमा प्रवेश गराउने तयारी भइरहेको छ।

ललितपुरका स्थायी वासिन्दा सिलवाल आगामी निर्वाचनमा संघीय संसदको उम्मेदवार बन्ने गरी पार्टी प्रवेश गर्न लागेको स्रोतले जानकारी दियो।

उपेन्द्रकान्त अर्यालले अवकाश पाएपछि सिलवाल नेपाल प्रहरीको महानिरीक्षक बन्ने दौडमा थिए। तर कांग्रेस–माओवादी गठबन्धन सरकारले जयबहादुर चन्दलाई प्रहरी प्रमुख बनाउने निर्णय गर्यो। सरकारी निर्णयका विरुद्ध सिलवाल सर्वोच्च अदालत गए। सर्वोच्चले चन्दको नियुक्ति बदर गरिदियो। तर चन्दको नियुक्ति बदर भएपनि सरकारले सिलवालको साटो प्रकाश अर्याललाई आइजिपी नियुक्त गर्यो। अर्यालको नियुक्तिले  आफूलाई अन्याय परेको भन्दै सिलवाल फेरि अदालत गए।

लामो समय निर्णय हुन नसकेको सिलवालको मुद्दा केही दिनअघि सर्वोच्चले खारेज गरिदियो। सर्वोच्चमा मुद्दा खारेज भएपछि सिलवालले नेपाल प्रहरीको डिआइजीबाट राजीनामा दिएका थिए।

यसअघि नेपाल प्रहरीका पूर्वआइजिपी रविन्द्रप्रताप शाह माओवादीका प्रवेश गरेका थिए  भने पूर्व एआइजी गणेश राई र सशस्त्र प्रहरी बलका रिसवदेव भट्टराई नयाँ शक्तिमा प्रवेश गरेका थिए।

Share:

प्रतिकृया दिनुहोस

© 2017 Setopati Sanchar Pvt. Ltd.