तेस्रो चरणको स्थानीय तह निर्वाचन: जनकपुर उपमहानगरपालिकामा नौलो रेकर्ड

सेतोपाटी संवाददाता

काठमाडौं, असोज ८

स्थानीय तह निर्वाचनमा जनकपुर उपमहानगरपालिकामा नौलो रेकर्ड कायम भएको छ।

नेपालमा हाल रहेका एघार उपमहानगरमध्ये हालसम्म दश वटाको मतपरिणाम आइसकेको छ। पहिलो चरणको स्थानीय तहको निर्वाचन हेटौंडा उपमहानगरपालिकामा मात्र भयो। दोस्रो चरणमा इटहरी, धरान, तुलसीपुर, घोराही, नेपालगञ्ज, धनगढी र बुटवलमा भयो। तेस्रो चरणमा निर्वाचन भएका तीन उपमहानगर जनकपुर, जीतपुर सिमरा र कलैयामा निर्वाचन भयो। त्यसमध्ये कलैयाको मतपरिणाम सार्वजनिक हुन बाँकी छ। तर मतपरिणाम सार्वजनिक भएको जनकपुरमा राजपा नेपालका उम्मेदवारले रेकर्ड कायम गरेका छन्।

अन्य उपमहारगपालिकामा मेयरमा विजयीहरूले झिनो मतअन्तरले उम्मेदवारलाई पराजित गर्दा जनकपुरका लालकिशोर साहले झण्डै दोब्बर मत अन्तरले प्रतिस्पर्धीलाई पछारेका हुन्। जनकपुर उपमहानगरपालिकामा राजपा उम्मेदवार लालकिशोर साहले सुरूअाती अग्रता लिएका थिए।

सुरूअाती अग्रतामा झिनो मतअन्तर देखिएको थियो। तर, त्यसपछि आएका मतपरिणाममा अरु उम्मेदवार उठ्ने र हिँड्ने कोसिसमा लाग्दा साह दौडिरहेका थिए। फलस्वरुप ४५ हजार ७ सय ९७ मत खसेको जनकपुरमा उनले २१ हजार ९ सय ३ मत पाए। उनका प्रतिस्पर्धी कांग्रेसका उम्मेदवार मनोज कुमार साहले ११ हजार १ सय ६४ मत मात्र। अर्थात् १० हजार ९ सय ३९ मतको अन्तरले लालकिशोर विजयी भए।

कुन उपमहानगरमा कति मतअन्तर?

धनगढी उपमहानगरपालिकामा कांग्रेसका नृप बड १४ हजार ३ सय २४ मत ल्याएर विजयी भएका थिए। ४७ हजार ७ सय ७६ भोट खसेको धनगढीमा स्वतन्त्र उम्मेदवार गोपाल हमाल ११ हजार ७ सय २७ मत ल्याएर पराजित भए। त्यहाँ विजयीको मतअन्तर केवल २ हजार ५ सय ९७ रह्यो।

नेपालगञ्ज उपमहागरपालिकामा ४१ हजार ८ सय ५३ मत खस्यो। राप्रपाका धवलशम्शेर राणाले १२ हजार ५ सय १५ मत ल्याएर विजयी भए। कांग्रेसका सुरेश कुमार कनौडिया ८ हजार ७ सय ३० ल्याएर पराजित भए। राणाले मात्र ३ हजार ७ सय ८५ अन्तरले जिते।

दाङको घोराहीमा ५३ हजार ९ सय ८८ मत खस्यो। एमालेका एमाले नरुलाल चौधरी २२ हजार ३० मत ल्याएर विजयी भए। कांग्रेस उम्मेदवार भुपबहादुर डाँगी १७ हजार ४ सय ८४ मत ल्याएर पनि पराजय बेहोर्न बाध्य भए। ४ हजार ५ सय ७३ मत अन्तरले त्यहाँ हारजित भयो।

दाङको अर्को उपमहानगरपालिका तुलसीपुरमा ५२ हजार १ सय ४१ मत खस्यो। एमालेका घनश्याम पाण्डेले २२ हजार ८ सय ५७ मत ल्याए। कांग्रेसका गेहेन्द्र गिरीले १८ हजार ९ सय ३ मत पाए। त्यहाँ पनि ३ हजार ९ सय ५४ मतले एमाले जित्यो।

बुटवल उपमहानगरपालिकामा ४५ हजार ९ सय ६१ मत खस्यो। नेकपा एमालेका शिवराज सुवेदी २३ हजार ३ सय ४९ मत ल्याएर जीत हात पार्न सफल भए। तर मेयरका लागि कांग्रेसका उम्मेदवार खेलराज पाण्डेले २० हजार ८ सय ५१ मत ल्याउँदा पनि जित्न सकेनन्। उनी २ हजार ४ सय ९८ मतले हारे।

इटहरी उपमहानगरपालिकामा ५१ हजार ५ सय २२ मत खसेको थियो। जितेका एमाले उम्मेदवार द्वारिकालाल चौधरीले २२ हजार ६ सय ८९ मत ल्याएका थिए। पराजित कांग्रेसका रोहितप्रसाद प्रसाँइले १९ हजार ९ सय ८५ मत ल्याए। हार र जीतबीचको अन्तर २ हजार ७ सय ४ रह्यो।

धरानमा ३९ हजार १ सय ६० मत खसेको थियो। त्यहाँ पनि कांग्रेसका तीलक राईलाई एमालेका तारा सुब्बाले हराए। २० हजार ९ सय ७५ मत ल्याएका सुब्बाले राईलाई ४ हजार ८ सय ७५ मतले हराए। राईले १६ हजार १ सय २ मत ल्याएका थिए।

पहिलो चरणमै निर्वाचन भएको हेटौंडामा ५४ हजार ४ सय ९८ मत खसेको थियो। त्यहाँ एमालेका हरिबहादुर महत २३ हजार १ सय २४ ल्याए। कांग्रेस र माओवादी गठबन्धन भएको हेटौंडामा कांग्रेस उम्मेदवार आनन्दराम पराजुली २२ हजार ५ सय ९ मत मात्र ल्याउन सके। त्यहाँ मतअन्तर केवल ६ सय १५ रह्यो।

तेस्रो चरणको निर्वाचन भएको जीतपुर सिमराको पनि मतपरिणाम सार्वजनिक भैसकेको छ। त्यहाँ पनि एमाले विजयी भएको छ। ४१ हजार ९ सय २५ मत खसेको जीतपुर सिमरामा एमालेका मेयर उम्मेदवार कृष्ण पौडेलले १४ हजार ८ सय ६५ मत प्राप्त गरे। कांग्रेसका कृष्णवर्त सिंहले ११ हजार ९ सय ९५ मत। अर्थात् पौडेलले वर्तलाई २ हजार ९ सय ६० मतले हराए।

बाराकै अर्को उपमहानगरपालिका कलैयामा भने मतगणना जारी छ।

जनकपुर उपमहागरपालिकामा ४५ हजार ७ सय ९७ खसेको थियो। त्यहाँ राजपाका लालकिशोर साहले २१ हजार ९ सय ३ मत ल्याए। उनले कांग्रेसका मनोजकुमार साहलाई १० हजार ७ सय ३९ मतले हराए। अर्थात् झण्डै मनोजले प्राप्त गरेको मत बराबर। मनोजले ११ हजार १ सय ६४ ल्याएका थिए। जुन हालसम्मको उपमहानगरपालिकामा देखिएको मतअन्तरको रेकर्ड हो।

प्रकाशित मिति: आइतबार, असोज ८, २०७४ ०७:१४

सिफारिस