नेकपा एमालेले प्रदेश नम्बर दुईको चुनावी मतपरिणाम अपेक्षाभन्दा कम भए पनि अप्रत्यासित नभएको बताएको छ।
शुक्रबार बिहान सेतोपाटीसँग कुरा गर्दै एमाले सचिव प्रदीप ज्ञवालीले आफूहरुले दुई नम्बर प्रदेशमा ४० सिट जित्ने आँकलन गरे पनि चुनावी परिणामले त्यो पूरा नहुने देखाएको बताए।
‘हाम्रो अपेक्षा योभन्दा बढी थियो, तर हामीलाई नतिजा अप्रत्यासित भने लागेको छैन,’ ज्ञवालीले भने, ‘मधेसमा एकदमै प्रतिकुल अवस्था थियो। केही अघिसम्म एमालेलाई त्यहाँ छिर्नसमेत दिइन्नथ्यो।’
उनले प्रदेश नम्बर २ मा पार्टीको कमजोर उपस्थिति लगायतका विषयमा छलफल गर्न शुक्रबार दिउँसो केन्द्रीय समिति बैठक बस्न लागेको जानकारी दिए।
‘प्रदेश नम्बर दुईको चुनावी नतिजा, प्रदेश र केन्द्रीय संसदको चुनावका विषयमा छलफल गर्न आजै केन्द्रीय समितिको बैठक बस्दैछौं,’ ज्ञवालीले भने, ‘दुई नम्बर प्रदेशमा पार्टी हारका विषयमा पनि बैठकमा समीक्षा हुनेछ।’
पहिलो र दोस्रो चरणको स्थानीय निर्वाचनमा पहिलो पार्टी बनेको एमाले प्रदेश नम्बर २ मा अहिलेसम्मको परिणाममा पाँचौ स्थानमा छ। १३६ स्थानीय तहमध्ये एमालेले ५ स्थानमा जित हात पारेको छ भने ११ स्थानमा अग्रता लिइरहेको छ।
प्रदेश नम्बर दुईका ठूला सहर वीरगन्ज र जनकपुरमा एमाले उम्मेदवार निकै पछि छन्।
बाराका दुई उपमहानगर कलैया र जितपुुर सिमरामा भने एमाले उम्मेदवारको अग्रता कायम छ। त्यस्तै सिरहाको लहानमा पनि एमाले उम्मेदवार मुन्नि साहले सुरुआती अग्रता कायम राखेका छन्।
महोत्तरीमा एक स्थानीय तहमा मात्र एमाले उम्मेदवारले अग्रता लिएका छन् भने नेता माधवकुमार नेपालको गृह जिल्ला समेत रहेको रौतहटका कुनै स्थानीय तहमा पनि एमाले उम्मेदवार अगाडि छैनन्।
पहिलो र दोस्रो चरणको स्थानीय निर्वाचनमा २८१ स्थान जित्दै एमाले पहिलो पार्टी बनेको थियो।
