जनकपुर उपमहानगरपालिकामा राष्ट्रिय जनता पार्टी (राजपा) नेपालले फराकिलो अग्रता लिएको छ। राजपाका मेयर उमेदवार लालकिशोर साहले कांग्रेस उमेदवार मनोज साहलेभन्दा २८ सय २३ मतले अगाडि छन्। राजपाका लालकिशोर साहले ४ हजार ६ सय ७९ मत ल्याएका छन् भने कांग्रेसक मनोज साहले १ हजार ८ सय ५६ मत पाएका छन्। अन्य पार्टीहरू प्रतिसपर्धामा नै देखिएका छैनन्।
जनकपुरमा ५७ हजार मत खसेको छ। यही ट्रेण्ड जारी रह्यो भने राजपाले निर्वाचन जित्ने देखिन्छ। अहिले आइरहेको मत भन्दा पनि राम्रो मत आउने राजपाका उमेदवार लालकिशोर यादवले दावी गरे ।
‘एक सय वटा मत पत्र भएको मत पेटीका खोल्दा ५० देखि ७५ मत मलाई परेको छ,’ सेतोपाटीसँग उनले भने,‘यो ट्रेण्ड अझै बढ्दै जान्छ तर घट्दैन।मेरो जित सुनिश्चित छ।’
कांग्रेसको प्रभाव क्षेत्रको मतगणना हुन बाँकी रहेकाले आफूले यो अन्तरलाई परिवर्तन गर्ने कांग्रेसका उमेदवार मनोज शाहले दावी गरे।
‘कांग्रेसको पकड रहेको वडाहरु ७, ८, ९, १२, १५, १६, १७, १८, १९, २०, २३, २४ र २५को मतगणना हुन बाँकी नै छ,’ उनले भने, ‘पाँच सय मतान्तरले भएपनि मैले निर्वाचन जित्छु।’
जनकपुर बजारमा कांग्रेसका बिरूद्धमा सबै एक हुने भएकोले कांग्रेसको थोरै मत आएको धनुषाका कांग्रेस सभापति रामसरोज यादवले सेतोपाटीलाई बताए ।
जनकपुर उपमहानगरका ग्रामीण भेगको मतगणनमा भएपछि भने अहिलेको नतिजालाई कांग्रेसले उल्टाउने उनले दावी गरे ।