समयको मागअनुसार काँग्रेसमा परिवर्तन नआए जन आधार नै गुम्छ : प्रकाशमान  सिंह


नेपाली काँग्रेसका नेता प्रकाशमान सिंहले काँग्रेसले अब संगठन तथा सोचमा परिवर्तन गर्नुपर्ने बताएका छन्।

सर्वमान्य नेता गणेशमान सिंहको २० औँ स्मृति दिवसको अवसरमा नेपाली काँग्रेस भक्तपुर क्षेत्र नं १ ले भक्तपुरको दुवाकोटमा आयोजना गरेको कार्यक्रममा बोल्दै नेता सिंहले समयको मागअनुसार काँग्रेसमा परिवर्तन नआए जन आधार गुम्ने बताए। उनले  पार्टीले गणेशमान सिंहको विचार र सिद्धान्तलाई बिर्सिदै गएको बताए ।

पार्टीमा लामो समय काम गरिसकेको भावना कदर गर्न नसकेको नतिजा गत निर्वाचनको परिणामले देखाएकाले अबको निर्वाचनमा कार्यकर्ता निर्णयमा उम्मेदवार छनोट गर्नसके काँग्रेस पहिलो पार्टी बन्ने नेता सिंहले बताए।

पूर्व उद्योग राज्यमन्त्री कञ्चनचन्द्र बादेले कार्यक्रममा बोल्दै काँग्रेसको नेतृत्वमा संविधान जारी भयो । अब प्रदेश तथा केन्द्रको निर्वाचन काँग्रेसको नेतृत्वमा सम्पन्न भएपश्चात् संविधानको कार्यान्वयन पनि हुने उनले बताए ।

नेपाली काँग्रेस भक्तपुर क्षेत्र नं १ का सभापति जीवन खत्रीको सभापतित्वमा सम्पन्न कार्यक्रमलाई सांसद रामेश्वर ढुंगेल, पूर्व सांसद लेखनाथ न्यौपाने, नेपाली काँग्रेस भक्तपुरका सभापति दुलर्भ थापालगायतले सम्बोधन गरेका थिए ।

Share:

© 2017 Setopati Sanchar Pvt. Ltd.