नेपाललाई दीर्घकालीन रुपमा द्वन्द्वमा फसाउने प्रयास असफल : अध्यक्ष ओली

ललितपुरको क्षेत्र नं ३ का नेताहरूले नेकपा(एमाले)का अध्यक्ष केपी शर्मा ओलीलाई राहत रकम हस्तान्तरण गर्दै


नेकपा(एमाले)का अध्यक्ष केपी शर्मा ओलीले नेपाललाई दीर्घकालीन रुपमा साम्प्रदायिक द्वन्द्वमा फसाउने प्रयासलाई नेपाली जनताले असफल पारिदिएको बताएका छन् । सामाजिक सद्भावको महत्वलाई बुझेका नेपाली जनताले निर्वाचनको माध्यमबाट यस्तो अभियानका अभियन्ताहरूलाई परास्त गरेको ओलीले बताए ।

तराईका बाढी पीडितलाई सहयोग गर्नका लागि एमाले ललितपुर क्षेत्र नम्बर ३ ले संकलन गरेको ३ लाख २५ हजार ७सय ८० रुपैयाँ राहत रकम आज आफ्नै निवास बालकोटमा बुझ्दै ओलीले एउटा भूगोल र समुदायमा विपद् पर्दा अर्को भूगोलले सद्भाव देखाउने नेपालीहरूको परम्परागत संस्कार भएको बताए ।

‘नेपालीको यो आत्मीयताको संस्कारलाई विथोल्न थुप्रै व्यक्ति र संस्थाहरू लागि परे’ ओलीले भने ‘भूगोल,जाति,धर्म आदिका नाममा नेपालीमा फाटो ल्याउन भएका सबै प्रयासले नेपाली जनताले निष्क्रिय पारेका छन् ।’

पछिल्ला दुई दशक नेपालमा द्वन्द्व उद्योग गर्नेहरू धेरै फस्टाएको ओलीले बताए । नेपालको जातीय विविधिता,भाषिक र साँस्कृतिक विविधतामा द्वन्द्वको बीउ रोपेर यसबाट छाक टार्नेहरूको बिगबिगी भएको ओलीले बताए । उनले  भने  ‘नेपाली समाजले द्वन्द्वलाई तिरस्कार गरेपछि त्यसको व्यवस्थापनका नाममा उद्योग गर्नेहरू पनि अहिले फस्टाएका छन् । यस्ता व्यक्ति वा संस्थाहरूबाट सजग हुनुपर्दछ ।’

केही तत्वहरू अझै पनि २ नम्बर प्रदेशमा द्वन्द्वको खेती गर्न सक्रिय भइरहेको ओलीको धारणा छ । ‘यी सबै तत्वहरूलाई जनताले निर्वाचन मार्फत परास्त गरेर सहिष्णु समाज निर्माणको आधार तय गर्नेछन् ।’

राहत रकम संकलन समितिका संयोजक रघुनाथ महर्जनका अनुसार उक्त रकम पार्टीका नेता, कार्यकर्ता, शुभचिन्तक र सहयोगीहरूबाट संकलन गरिएको हो ।
राहत रकम नेकपा(एमाले) केन्द्रीय कार्यालयले सञ्चालन गरेको नेकपा एमाले प्राकृतिक विपत्ति कोषको खातामा जम्मा गरेर तराईका बाढी पीडितलाई अविलम्ब पुर्‍याइने व्यवस्था गरिने ओलीले बताए ।

 

Share:

प्रतिकृया दिनुहोस

© 2017 Setopati Sanchar Pvt. Ltd.