‘सप्तकोसीको पानी र कांग्रेसको उभार उस्तै’

घरदैलोमा कांग्रेस उम्मेदवार


सप्तरीको सप्तकोसी नगरपालिकाका कांग्रेसबाट मेयरका उम्मेदवार कृष्णप्रसाद ढकालले मधेसमा सप्तकोसीको पानी र कांग्रेसको उभार उस्तै रहेको बताएका छन् ।

कांग्रेसले विकासोन्मुख नगरमा भौतिक विकास, शिक्षा र अत्यावश्यक समस्याको सम्बोधनको कार्ययोजना बनाएको उनले बताए । राम्रो अस्पताल, उचित शिक्षण संस्थान र नगरको तिव्र विकासमा कांग्रेसका योजना बनिरहेको बताए ।

जनप्रतिनिधि नहुँदा अस्तव्यस्त बनेको बजारको उचित व्यवस्थापन, छात्रवृत्ति, शिक्षकका समस्याका लागि पहल गरिने घरदैलोका क्रममा जनतासँग उनले वाचा गरेका छन् । ‘कृषि मल, विउविजन, छात्रवृत्तिका समस्या छन् । समाधानका लागि पहल हुनेछ’, उनले भने,‘यो आश्वासन हैन, हामीले गर्नैपर्ने दायित्व भएकाले चाँडो भन्दा चाँडो पुरा गर्ने मेरो प्रतिबद्धता हो ।’

२ असोजको तेस्रो चरणको चुनावी अभियानमा सप्तरीको पूर्वी उत्तरमा पर्ने सप्तकोशी नगरपालिकामा तिव्र स्पर्धा हुने भएको छ ।

मधेस क्षेत्रमा परेपनि मधेसवादी दललगायत नेपाली कांग्रेस, नेकपा एमाले र नेकपा माओवादीको तिव्र स्पर्धा देखिएको सप्तकोसी नगरपालिकाको घर दैलोमा सवै दलका उम्मेदवार व्यस्त रहेका छन् ।

उम्मेदवारी दर्ता गरेपनि सवै दलका उम्मेदवार चुनावी नारा लिएर घरदैलोमा व्यस्त रहेका छन् । राजमार्गदेखि १० किलोमिटर पूर्वी उत्तरमा पर्ने वैकल्पिक राजमार्गको केन्द्रविन्दु रहेको सप्तकोसी नगरका कांग्रेसका मेयर उम्मेदवार ढकाल, उपमेयर रीतकुमारी चौधरीलगायत घरदैलोमा व्यस्त रहेका छन् ।

 

Share:

प्रतिकृया दिनुहोस

© 2017 Setopati Sanchar Pvt. Ltd.