राष्ट्रिय प्रजातन्त्र पार्टीका अध्यक्ष कमल थापाले तीन ठूला दलको आडमा मुलुक भ्रष्टाचारमा चुर्लुम्म डुबेको आरोप लगाएका छन् ।
बिहिबारदेखि काठमाडौंमा सुरू भएको स्थानीय तहका पार्टीका अध्यक्षहरूको मध्यमाञ्चल स्तरीय क्षेत्रीय सम्मेलनलाई सम्बोधन गर्दै उनले सो कुरा बताएका हुन् ।
कार्यक्रमलाई सम्बोधन गर्दै अध्यक्ष थापाले ठूला दल र सरकारका मन्त्रीहरूले मिलेर खाने गरेकाले भ्रष्टाचारीहरूलाई कारबाही गर्ने अवस्था नरहेको दाबी गरे । भ्रष्टाचारका कारण मुलुक असफल राष्ट्र बन्न लाग्दा समेत तीन ठूला दल गम्भीर नबनेको भन्दै आक्रोश व्यक्त गरे ।
अध्यक्ष थापाले मुलुकमा हिन्दु राष्ट्र कायमै गरेर छाड्ने दाबी पनि गरे । उनले जनमतकै बलमा हिन्दु राष्ट्र कायम गर्न पार्टीले शान्तिपूर्ण आन्दोलन गरिरहेको बताए ।
अध्यक्ष थापाले मुलुकमा हिन्दु राष्ट्र कायम गराउने अभियान कठिन भएपनि असम्भव भने नरहेको उल्लेख गरे ।
