शिक्षण अस्पताल महाराजगञ्जका डाक्टर गोविन्द केसीले आज बस्ने भनेको अनसन तत्काललाई स्थगन गरी अबको निशानामा आन्तरिक राजस्व विभागका निलम्बित प्रमुखदेखि आयल निगमका प्रमुख गोपाल खड्कासम्मलाई बनाउने बताएका छन् ।
बुधबार एक विज्ञप्ति निकालेर उनले आन्तरिक राजस्व विभागका निलम्बित प्रमुख डा. चूडामणि शर्मादेखि आयल निगमका प्रमुख गोपाल खड्कालाई निशाना बनाउने बताएका हुन् ।
‘आन्तरिक राजस्व विभागका निलम्बित प्रमुखदेखि अरबौं भ्रष्टाचार र अनियमिततामा मुछिएका आयल निगमका प्रमुख गोपाल खड्का लगायत चिनिएका भ्रष्टहरुलाई राजनीतिक दलहरुले दिएको संरक्षणले भ्रष्टाचार र लुटतन्त्रलाई झनै बढावा दिएको छ। सञ्चार माध्यममा प्रमाणसहित भ्रष्टाचारका विवरण आउँदा पनि सरकारले बर्खास्त नगर्नु र अख्तियारले समेत छानविन नगर्नुले निरपेक्ष दण्डहीनता सिर्जना गरेको छ । त्रिवि पदाधिकारीहरुको चर्को अनियमितताबारे दर्जनौं उजुरीहरु पर्दासमेत अख्तियारले छानविन अघि नबढाउनुले पनि संवैधानिक निकायको कार्य सम्पादनमाथि प्रश्न उठेको छ । यस्तो चौतर्फी भ्रष्टाचार र दण्डहीनता पनि हाम्रो अभियानको अबको चरणको निशाना बन्ने जानकारी गराउन चाहन्छौं,’ डा. केसीले जारी गरेको विज्ञप्तिमा लेखिएको छ ।
साथै उनले भनेका छन्, ‘पारदर्शिता ल्याउन र शक्तिमा हुनेहरुलाई जवाफदेही बनाउन विभिन्न बौद्धिक वर्ग, नागरिक समाज र सञ्चार माध्यमहरुले खेलेको भूमिकालाई सराहना गर्दै भविष्यमा अझ सशक्त र रचनात्मक रुपमा त्यस्तो भुमिका निर्वाह हुनेछ भन्ने आशा गर्दछु।’
यसैबीच उनले हामीसँग लगातार सम्झौता भए अनुसार त्रिवि चिकित्साशास्त्र अध्ययन संस्थान (आइओएम)लाई थप स्वायत्तता दिनको सट्टा यहाँ भएका अधिकार समेत खोसेर लगेका त्रिवि पदाधिकारीहरुले ती अधिकार दुरुपयोग गर्दै त्यस्तो सम्बन्धन दिएका बताएका छन्। ‘त्यस्तो जघन्य शैक्षिक अपराध हुँदा पनि राज्यका अन्य निकायहरु मौन बसेकाले अरु जिम्मेवार व्यक्तिहरुको समेत त्यसमा मिलेमतो भएको देखिएको थियो । आज सो मेडिकल कलेजको सम्बन्धन खारेज गर्ने गरी भएको निर्णय सकारात्मक छ तर जबसम्म चिकित्सा शिक्षा ऐन सही रुपमा आउँदैन, तबसम्म यस्ता जालझेलपूर्ण निर्णयहरु भइरहने देखिन्छ।’
‘काठमाडौं नेशनलको सम्बन्धन खारेजी र लगत्तै आउँदै गरेका चाडपर्वका कारण हामीले आजदेखि शुरु गर्ने भनेको सत्याग्रहको कार्यक्रम तत्कालका लागि स्थगन गरेका छौं,’ उनले विज्ञप्तिमा भनेका छन्।
