प्रशासकीय अदालतको कार्य क्षेत्र विस्तार गर्ने तयारीमा सरकार


सरकारले प्रशासकीय अदालतको कार्य क्षेत्र विस्तार गर्ने भएको छ ।

कानून, न्याय तथा संसदीय मामिला मन्त्री यज्ञबहादुर थापाले प्रशासकीय अदालतको कार्यक्षेत्र विस्तार गर्ने प्रतिबद्धता व्यक्त गरेका हुन् । काठमाडौंमा आयोजित प्रशासकीय अदालतको वार्षिकोत्सव कार्यक्रममा बोल्दै उनले कर्मचारीमाथि हुने विभागीय कारबाहीहरूको पुरावेदन सम्बन्धी मुद्दा  प्रशासकीय इजलासबाटै हेर्न सकिने गरी आवश्यक कानूनको तर्जुमा भइरहेको  जानकारी दिए ।

मन्त्री थापाले प्रशासकीय अदालतको कार्य क्षेत्र विस्तार गरेपछि सर्वाेच्च अदालतलाई न्याय सम्पादन गर्न अझै सहज हुने विश्वास  व्यक्त गरेका छन् ।

कार्यक्रममा बोल्दै मुख्य सचिव राजेन्द्रकिशोर क्षेत्रीले सबै तहको कर्मचारीहरूको काम कारबाहीमा एकरूपता ल्याउन प्रशासकीय अदालतको महत्वपूर्ण भूमिका हुने स्पष्ट पारे । उनले  प्रशासनिक प्रणाली परिवर्तन भएसँगै कर्मचारी व्यवस्थापनको काम चुनौतीपूर्ण रहेको  उल्लेख गरे ।

सरकारले संघीय ढाँचा अनुसार कर्मचारी व्यवस्थापन गर्ने तयारी गरिरहेको छ । मुख्य सचिव क्षेत्रीले सबै तहको कर्मचारीको काम कारबाहीमा एकरूपता ल्याउनुपर्ने चुनौतीलाई सामना गर्न सम्बन्धित सबै पक्षले गम्भीर भएर सोच्ने बेला आएको बताए ।

Share:

प्रतिकृया दिनुहोस

© 2017 Setopati Sanchar Pvt. Ltd.