प्रतिनिधि सभा सदस्य निर्वाचन विधेयक र प्रदेश सभा निर्वाचन विधेयक संसदको राज्य व्यवस्था समितिबाट पारित भएको छ।
विधेयकमा भ्रष्ट्राचारीलाई समेत निर्वाचन लड्न दिनुपर्ने प्रावधान राख्न कांग्रेसका सांसदहरूले संशोधन हालेका थिए। तर अन्तत: विधेयक भ्रष्ट्राचारी ठहर भएकाहरूलाई चुनाव लड्नै नपाउने व्यवस्था गरी पारित भएको हो।
विधेयकले भ्रष्ट्राचारसहित मानव बेचबिखन तथा ओसारप्रसार, लागू औषध विक्री वितरण तथा निकासी पैठारी, सम्पति शुद्धीकरण, राहदानी दुरूपयोग, अपहरण सम्बन्धी कसुरमा सजाय पाएकाहरूले अब प्रतिनिधि सभामा उम्मेदवार बन्नबाट रोकेको छ।
यो व्यवस्थापछि कांग्रेसका नेता खुमबहादुर खड्का, चिरञ्जीवी वाग्ले, पूर्व मन्त्री जेपी गुप्ता, बालकृष्ण ढुङ्गेल लगायतको सांसद र मन्त्री बन्ने सम्भावना समाप्त भएको छ। त्यस्तै, संगठित अपराध सम्बन्धी कैदको सजाय पाई २० वर्षभन्दा कम सजाय पाई कैद भुक्तान गरेका व्यक्ति पनि ६ वर्षसम्म उम्मेदवार हुन पाउने छैनन्।
त्यस्तै, कर्तव्य ज्यान अर्थात् हत्याको मुद्दामा २० वर्ष कम सजाय पाएर कैद भुक्तान गरिसकेपछि ६ वर्षसम्म उम्मेदवार बन्न पाउने छैनन्। जातिय भेदभाव छुवाछुत, बोक्सा बोक्सी वा बहुविवाहको कसूरमा कैदको सजाय पाएका व्यक्ति कैद समाप्ती भएको ३ वर्षसम्म उम्मेदवार बन्नबाट बञ्चित भएका छन्। त्यस्तै, जघन्य अपराध बाहेक अन्य अपराध गरेका व्यक्तिले समेत सजाय काटेको ६ वर्षसम्म उम्मेदवार बन्न पाउने छैनन्।
कुनैपनि कैदी उम्मेदवार बन्न पाउने छैन। त्यस्तै, कालो सूचीमा रहेको व्यक्ति समेत कालो सूचीबाट नहटेसम्म निर्वाचनमा उम्मेदवार हुन पाउने छैनन्। प्रतिनिधि सभा र प्रदेश सभा चयनका लागि आउँदो मंसिर १० गते र २१ गते निर्वाचन हुदैँछ।