पूर्वप्रधानमन्त्री तथा नेकपा (माआवादी केन्द्र) का अध्यक्ष पुष्पकमल दाहालले ढिलै भएपनि राजपा स्थानीय निर्वाचन लगायतका अन्य निर्वाचनमा सहभागिता जनाउनुले संविधान कार्यान्वयनमा ठूलो टेवा पुग्ने बताएका छन् ।
जितपुर सिमरा वार्ड नं १६, टाँगिया बस्तीमा आज आयोजित एक कार्यक्रममा उनले संविधान संशोधन गरी तराई मधेसका जनताको पीडा सम्बोधन गर्न सत्ता साझेदार दलहरूको सहयोगमा सदनमा संविधान संशोधन प्रस्ताव पेश गरेपनि नेकपा (एमाले) का कारण असफल भएको र मधेस विरोधी पार्टी कुन हो भन्ने कुरा तराई मधेसका जनतालाई राम्ररी थाहा भइसकेको बताउँदै मतदानको माध्यमबाट त्यस्ता दललाई पाठ सिकाउनु पर्ने उनले बताए ।
तराई मधेसका जनतामा नेकपा (माओवादी केन्द्र)मा पार्टी प्रवेश गर्ने लहर नै चलेको हुँदा २ नं प्रदेशमा पार्टी पहिलो हुने दाबी समेत गरे । तराई मधेसका यावत समस्याका लागि माओवादी केन्द्र सम्वेदनशील रहेको भन्दै पूर्वप्रधानमन्त्री दाहालले मधेसको मुद्दा सम्बोधन गरेरै छाड्ने प्रतिबद्धता ब्यक्त गरे ।
टाँगिया बस्तीका १६ सय जनतालाई भौतिक सुविधासहित अर्को स्थानमा स्थानान्तर गर्ने बताउँदै उनले चिन्ता नमान्न स्थानीय बासिन्दालाई आग्रह गरे ।
जितपुर सिमरा नपाको टाँगिया बस्तीको माओवादी केन्द्रका एकाई कमिटी अध्यक्ष सुमन ठोकरको अध्यक्षतामा सम्पन्न सो कार्यक्रममा नेताहरू रामबहादुर थापा, गोपाल ठाकुर, जयराम दाहाल, अनिल श्रेष्ठ, राजन पौडेललगायतले सम्बोधन गरेका थिए । रासस
