नेपाली कांग्रेसका नेता एवम् सांसद धनराज गुरुङले असोज २ गते प्रदेश नम्बर २ मा हुने स्थानीय तहको तेस्रो चरणको निर्वाचनमा आफ्नो पार्टी कुनैपनि पार्टीसँग तालमेल नगरी चुनाव लड्न सक्षम रहेको बताएका छन् ।
शुक्रबार राजधानीमा आयोजित साक्षात्कारमा बोल्दै सांसद गुरुङले कांग्रेस आफैँ एक्लै चुनाव लड्न सक्षम रहेको बताएका हुन् । उनले भने,‘हामी एक्लै चुनाव लड्न सक्षम छौं, कसैसँग पनि तालमेल गर्न जरुरी छैन्।’ उनले यसअघिका चुनावी तालमेलमा पार्टीले गलत गरेको समेत गुनासो पोखे ।
साक्षात्कारमा बोल्दै उनले अब हुने चुनावमा आफ्नो पार्टी पहिलो हुने दाबी समेत गरेका हुन् । यद्यपी उनले पार्टीको सम्पूर्ण तयारी र वर्तमान अवस्था पूर्ण रूपले राम्रो छ भन्ने अवस्था भने अहिले नै भन्न नसकिने जिकिर गरे । उनले थपे,‘पार्टीका शीर्ष नेताहरू आज त टिकट टुँगो लगाउने भनेर कस्सिनुभएको छ, चुनाव आउन अब जम्माजम्मी थोरै दिन बाँकी छ।’
त्यस्तै, उनले तराई मधेसमा बाढी पीडितहरूको लागि राहत वितरणमा गलत भएको भनेर चर्चा तथा परिचर्चा गर्नुको साटो बाढी समस्याको समाधान दिर्घकालीन रूपमा खोज्न सरकार लाग्नुपर्ने सुझाए । उनले भने,‘के कारणले तराई मधेस वर्षेनी डुबानमा पर्छ, यसको कारण खोज्नुपर्छ, मित्रराष्ट्र भारतसँग कुटनैतिक रूपमा सरकारले कुरा राख्नुपर्छ।’
